काठमाडौं । प्रतिनिधिसभाको सभामुखका लागि मंगलबार उम्मेदवारी दर्ता हुँदै छ । सभामुखको निर्वाचन माघ १२ गते आइतबार हुँदै छ ।
संसद सचिवालयका अनुसार मंगलबार बिहान ११ देखि दिउँसो २ बजेसम्म उम्मेदवारी दर्ता हुने छ । सचिवालयले आजै दिउँसो साढे २ बजे उम्मेदवारको नामावली प्रकाशन गर्नेछ ।
सभामुखका लागि सत्तासीन नेकपाले अग्नि सापकोटालाई उम्मेदवार बनाउने निर्णय गरेको छ । प्रमुख प्रतिपक्षी नेपाली काङ्ग्रेसले अझै निर्णय गरिसकेको छैन । सभामुखका लागि नेकपासँग झण्डै दुईतिहाइ बहुमत छ । प्रतिनिधिसभा सदस्यमध्ये सामान्य बहुमतबाट सभामुख निर्वाचित हुने भएपछि सापकोटाको प्रतिद्वन्द्वी औपचारिकताका लागि मात्र हुने छन् ।
काङ्ग्रेसले यसअघि सभामुख र उपसभामुखमध्ये एक पद आफूले पाउनुपर्ने बताउँदैआएको थियो ।
संभवत नेकपाको समर्थनमा उपसभामुख राष्ट्रिय जनता पार्टीबाट बन्ने छन् । संविधानमा सभामुख र उपसभामुख फरकफरक दलका हुनुपर्ने र एक जना महिला हुनुपर्ने छ । राजपाले उपसभामुख पाउँदा सो स्थानमा महिला उम्मेदवार बन्ने छन् ।
बलात्कार प्रयासको आरोप लागेपछि तत्कालीन सभामुख कृष्णबहादुर महराले गत असोज १४ गते राजीनामा दिएका थिए । त्यसयता सभामुख पद रिक्त छ भने महराविरुद्ध अदालती कारवाही चलिरहेको छ ।
