कुनै बेला तत्कालीन माओवादीका अध्यक्ष पुष्पकमल दाहालसँग 'कि लाऊ माया उहीतिर कि लाऊ मैतिर, निर लगाऊ दुईतिर' बोलको गीतमा नाचेर चर्चा कमाएको नायिका रेखा अहिले फेरि चर्चामा छिन् ।
त्यो बेला उनको चर्चामा माओवादी अध्यक्ष दाहालसमेतले कम्मर मर्काएर साथ दिन खोजेको थिए । त्यतिखेर रेखालाई दाहालको साथ थियो भने अहिले राप्रपा संयुक्तका अध्यक्ष पशुपति सम्सेर जबराको हात मिलेको छ ।
सन्दर्भ हो, राप्रपा संयुक्तको जनकपुर लुम्बिनी धार्मिक यात्रा । कात्तिक २८ गते बिहीबार यात्रा सुरु भयो जनकपुरधामबाट । रथ यात्रा हो यो । यो यात्राका क्रममा चकलेटी नायिका रेखा थापाले राप्रपा अध्यक्ष राणाको हात समातेर डोहोर्याउँदै गरेको फोटो अहिले चर्चामा छ । रेखाले हात अगाडि बढाइन अध्यक्ष राणाले हात दिए रेखालाई र अघि बढ्यो राप्रपा संयुक्त ।
दुई वर्षअघि राप्रपा एक भई महाधिवेशन भएको थियो । त्यो महाधिवेशनको केही महिनाअघिमात्रै रेखा राप्रपामा प्रवेश गरेकी थिइन् । त्यो महाधिवेशनमा रेखा केन्द्रीय सदस्य उम्मेदवार बनी विजयी भइन् । सोही महाधिवेशनमा राम्रो मत ल्याएकी कोमल वली भने एमाले प्रवेश गरेर अहिले नेकपाबाट राष्ट्रियसभा सदस्य बनेकी छिन् । पार्टी कमजोर भएपछि रेखाले भने केही अवसर पाउन सकिनन् ।
एकता महाधिवेशन भएको एक वर्ष नपुग्दै राप्रपा फुट्यो । पशुपति सम्सेर राणाले राप्रपा संयुक्त खोल्दा रेखाले साथ दिइन् । सहीछाप गरिन् । पशुपतिलाई दिएको साथलाई रेखाले निरन्तरता दिएकी छिन् ।
