असंलग्न राष्ट्रहरूको सम्मेलनमा भाग लिएर प्रधानमन्त्री केपी शर्मा ओली अजरबैजानको बाकुबाट फर्कँदा त्रिभुवन अन्तर्राष्ट्रिय विमानस्थलमा केही समय उडान र अवतरण प्रभावित भयो ।
सैद्धान्तिक रुपमा सबै समान भन्ने कम्युनिस्ट सरकार सुध्रिएन । भिभिआइपी सवारी भन्दै अरू विमानलाई उडान तथा अवतरणमा रोक लगाइएको थियो ।
यो घटनाको अहिले सर्वत्र विरोध भएको छ । विरोध अब सामाजिक सञ्जालमा मात्र होइन । यात्रुले तत्कालै विमानस्थलको रनवे नजिकै पनि गरेका छन् ।
उडन ठिक्क परेको विमानको इन्जिन नै अफ गर्नु परेपछि यात्रुको पारो तात्नु पनि ठिकै थियो । विमानबाट यात्रुहरू ओर्लिएर विरोध जनाए । स्थिति यस्तो बन्यो कि प्रहरी नै विमानस्थलभित्र पुग्नु परेको थियो ।
तिहारको बेला । अझ लक्ष्मी पूजाको दिन । श्री एयरलाइन्सको विमान काठमाडौँबाट भद्रपुरका लागि उडन ठिक्क परेको थियो । कतिलाई जिल्ला पुगेर लक्ष्मी पूजाको तयारी गर्नु थियो । कतिलाई आफ्नो घर वा चेलीबेटीकोमा पुग्नु थियो । तर भिभिआइपी सवारीका कारण उडान रोकिएपछि यात्रुहरू विमानबाट बाहिरिएर विरोध जनाउन बाध्य भएका थिए ।
अरू देशमा भएको भए यस्तो घटनापछि सरकार वा विमानस्थल प्रशासनले माफी माग्ने गर्छ । कतिपय देशमा त मन्त्रीले राजीनामासम्म गरेका उदाहरण छन् । तर नेपाल हो । विमानस्थल प्रशासनले यसलाई सामान्य भनेको छ । भिभिआइपी सवारीमा केही समय उडान र अवतरण रोकिनु सामान्य भएको उसले जनाएको छ ।
राष्ट्रपति तथा प्रधानमन्त्रीको विदेश भ्रमणका समयमा अक्सर विमानस्थलमा नेपालीले दुख पाउने गरेका छन् ।
पर्यटनमन्त्री योगेश भट्टराईले नेपालगन्जबाट काठमाडौँ आउने क्रममा बुद्ध एयरको विमान ४५ मिनेट डिले गराएको भन्दै भ्रष्टाचार विरोध अभियन्ता ज्ञानेन्द्र शाहीलगायतले मन्त्रीलाई आपत्ति जनाएका थिए ।
असहमति प्रति धेरैले साथ जनाए पनि त्यस बखतको व्यवहारलाई कतिपयले रुचाएनन् । असहमति प्रकट गर्ने शैलीबारे जसले जे धारणा राखे पनि भिआइपी वा भिभिआइपीको नाममा सर्वसाधारणको हवाइउडान तालीका र समय प्रभावित हुन नहुनेमा कमैको विमति देखियो ।
नेपालगन्ज घटनाबाटै सरकारले पाठ सिक्नु पर्नेमा सो घटनालाई राजनीतिक प्रतिशोधमात्र ठानेर समस्याको दीर्घकालीन समाधान खोजिएको छ । यहाँ बुझ्नु पर्ने कुरा के छ भने आज आइतबार भद्रपुर जाने विमानभित्र न त ज्ञानेन्द्र शाही थिए न त वरिष्ठ अधिवक्ता बालकृष्ण न्यौपाने नै । तर यात्रुको धैर्यताको सीमा टुट्यो ।
केही समयअघि राष्ट्रपतिको सवारी भनेर बाटोमा ट्राफिकले धेरैबेर अवरोध गरेपछि चालकहरूले त्यसको अवज्ञा गरेका थिए । जनस्तरमा देखिएको यो आक्रोश व्यवस्थापनको उपायको खोजीमा भन्दा सरकार र सरकारी निकायले त्यस्ता घटनामा राजनीतिबाहेक केही देख्ने गरेको छैन ।
