प्रधानमन्त्री केपी शर्मा ओलीले विभिन्न पक्षबाट लोकतन्त्रविरुद्ध खतरा सिर्जना गर्न खोजिएको बताएका छन् ।
सिंहदरबारमा संसद भवनको शिलान्यास गर्दै प्रधानमन्त्री ओलीले लोकतन्त्रमाथि खतराको प्रयास भइरहेको बताएका हुन् ।
यसअघि ओलीले संविधान जोगाउन भन्दै सर्वदलीय बैठक बोलाएका थिए । भारतीय विदेशमन्त्री एस जयशंकर नेपाल भ्रमण आउनु दुई दिनअघिमात्रै त्यस्तै बैठक बोलाउनुलाई राजनीतिक फाँटमा अर्थपूर्ण रुपमा लिइएको थियो ।
बुधबार संसद भवनको शिलान्यसमा उनले लोकतन्त्र गुमिहाल्ने अवस्था बनिनसकेको तर प्रयास भने भइरहेको बताए । कसले त्यस्तो प्रयास गरिरहेको छ भनेर उनले स्पष्ट पारेनन् ।
एक महिनाअघि प्रधानमन्त्रीका परराष्ट्रमामिला सल्लाहकार राजन भट्टराईले सामाजिक संजालमा देशी तथा विदेशीहरुबाट लोकतन्त्रविरोधी गतिविधि भइरहेको जनाएका थिए । त्यतिखेल उनको आलोचना पनि भएको थियो ।
प्रधानमन्त्रीले आफूलाई बघिनी अर्थात माउ र लोकतन्त्रलाई बच्चा अर्थात डमरुको संज्ञा पनि दिए । उनले भने- 'डमरुमाथि खतरा नभएसम्म बघिनीले केही गर्दिन । तर डमरुमाथि खतरा परे बघिनीले छोड्दिन ।'
उनले लोकतन्त्रमाथि खतरा भए सरकार चुप लागेर नबस्ने बताए ।
उनले नेपाली समाजमा हिंसाका लागि स्थान नभएको र अहिले केही हिंसात्मक प्रयास भए पनि ती क्षणिक वितण्डा मात्रै रहेको बताए ।
सरकारमाथि भ्रष्टाचार नियन्त्रणबारे पनि प्रश्न उठिरहदा प्रधानमन्त्री ओलीले भने नयाँ संसद भवनमा भ्रष्टाचारको विषयमा छलफल गर्नु नपर्ने अवस्था आउने ठोकुवा गरेका थिए ।
