एजेन्सी । अमेरिकाको मध्यपूर्वी राज्य टेनेसीमा आएको आँधीका कारण २४ जनाको मृत्यु भएको अमेरिकी अधिकारीले बताएका छन् ।
त्यहाँकाे स्थानीय समयअनुसार मङ्गलबार बिहानबाट आएको आँधीका कारण हालसम्म ज्यान गुमाउने व्यक्तिको सङ्ख्या २४ पुगेको बुधबार प्राप्त समाचारमा जनाइएको छ ।
त्यहाँको भौतिक संरचनाहरूमा पनि व्यापक क्षति पुगेको छ । आँधीले उक्त राज्यको राजधानी न्यासभिलमा समेत व्यापक संरचनाहरूमा क्षति पुर्याएको अधिकारीहरुले जानकारी दिएका छन् ।
टेनेसीको विपद् व्यवस्थापन निकायका मेलिसा हक्सले आँधीले पुर्याएको क्षतिबारे बताए, ‘आँधीका कारण ‘यसपटक २४ व्यक्तिको मृत्यु’ भएको छ भने राज्यका चार ‘काउन्टी’ मा व्यापक भौतिक संरचनामा क्षति पुगेको छ ।’
न्यासभिलको अग्नि नियन्त्रण विभागले आँधीका कारण १ सय ४० भन्दा बढी भवन भत्किएका र कैयौँ व्यक्ति भवन भग्नावशेषमा पुरिएका जनाएको छ ।
