काठमाडौं । अमेरिकाले नेपाललाई खोप सहायता उपलब्ध गराउने भएको छ ।
राष्ट्रपति कार्यालयले सुरुमा आफ्नो तथा कूटनीतिक प्रयासमा ५० लाख डोज खोप दिने भनेर सामाजिक सञ्जालमार्फत भने पनि पछि मात्रालाई सच्याएको छ ।
राष्ट्रपति विद्यादेवी भण्डारीले अमेरिकी राष्ट्रपति जो बाइडेनलाई पत्र पठाएपछि र अन्य कूटनीतिक तहबाट गरिएका प्रयासबाट ५० लाख डोज भ्याक्सिन आउन लागेको राष्ट्रपति कार्यालयका अधिकारीहरूले दाबी गरेका थिए । नेपालले ५० लाख खोप पाउने भएको राष्ट्रपति कार्यालयका सञ्चार सल्लाहकार टीका ढकालले ट्वीट गरे पनि पछि सच्याएका थिए ।
उनको ट्विटमा 'सम्माननीय राष्ट्रपतिज्यूको अग्रसरता र नेपाल सरकारको क्रियाशीलताले कोभिड-१९ विरुद्धको खोप प्राप्तिमा आज अर्को सफलता प्राप्त भएको छ । हाम्रो अनुरोधलाई स्वीकार गर्दै संयुक्त राज्य अमेरिकाले नेपाललाई पचास लाख डोज खोप उपलब्ध गराउने जानकारी गराएको छ' भनेका थिए ।
प्रधानमन्त्री केपी शर्मा ओलीले पनि आजै बेलुकी ट्विट गर्दै खोप दिने अमेरिकी निर्णयको स्वागत गर्दै अमेरिकालाई धन्यवाद दिएका छन् ।
प्रधानमन्त्रीले खोप सहायताबाट नेपाल र अमेरिकाबीचको मित्रताको सुदृढतालाई पुष्टि गरेको बताएका छन् ।
We welcome the US decision to provide COVID-19 vaccines to Nepal. Thank you @POTUS, @VP for responding to our appeal for these precious life-saving doses! Nepal and Nepali people remain grateful. This reaffirms the strength of Nepal-US friendship.
— K P Sharma Oli (@kpsharmaoli) June 3, 2021
