काठामाडौं । भारतमा कोरोना संक्रमितको सङ्ख्या बढ्दै गएको छ । संक्रमणसँगै त्यहाँ मृत्युको सङ्ख्या पनि थामिएको छैन ।

इटालीलगायतका मुलुकमा कुल संक्रमितको १२ प्रतिशतभन्दा बढीको मृत्यु भएकोमा भारतमा मृत्यु दर ३ प्रतिशतको हाराहारीमा छ । यो सामग्री तयार गर्दासम्म भारतमा २४ हजार ५३० जनामा संक्रमण पुष्टि भएको छ । त्यसमध्ये ७८० जनाको मृत्यु भएको छ । यो कुल संक्रमितको ३ दशमलव १७ प्रतिशत हो । भारतमा ५ हजार ४९८ जना उपचारपछि निको भएका छन् ।

भारतमा शुक्रबारमात्रै १ हजार ४०८ जना संक्रमित थपिए भने ५९ जनाको मृत्यु भएको थियो । भारतमा पछिल्लो एक सातामा औसत १२ सयभन्दा बढी संक्रमित थपिने गरेका छन् ।

सार्कको अर्को देश पाकिस्तानमा पनि संक्रमण बढ्दो छ । पाकिस्तानमा ११ हजार ९४० जना संक्रमित देखिएका छन् । त्यहाँ २५३ जनाको मृत्यु भइसकेको छ । पाकिस्तानमा कुल संक्रमितको २ दशमलव ११ प्रतिशतले ज्यान गुमाएका छन् । त्यहाँ २ हजार ७५५ जना निको भएका छन् ।

पाकिस्तानमा पछिल्लो एक सातामा दैनिक ७ सयको हाराहारीमा संक्रमित थपिएका छन् । शुक्रबार ८८३ जनामा संक्रमण पुष्टि भएको थियो भने १८ जनाको ज्यान गएको थियो ।

सार्क सदस्य मुलुकमध्ये माल्दिभ्स, नेपाल र भुटानले अहिलेसम्म मानवीय क्षति व्यहोर्नु परेको छैन । सबैभन्दा कम संक्रमण भुटानमा ७ जना देखिएको छ । त्यसमध्ये ३ जना उपचारपछि ठिक भइसकेका छन् ।

यस्तो छ सार्क मुलुकमा कोरोनाको असर