काठमाडाैं । विश्व स्वास्थ्य संगठनसहितको टोली उदयपुरको झुल्के पुगेको छ । उदयपुरको भुल्केका २८ जनामा कोरोना संक्रमण देखिएपछि संक्रमणको कारण पत्ता लगाउन सो टोली उदयपुर पुगेको हो ।
स्वास्थ्य मन्त्रालयका विज्ञ सल्लाहकार डा. खेम कार्कीले विश्वस्वास्थ्य संगठनका सदस्यसहितको सो टोलीले उदयपुरमा कोरोना फैलिनुको कारण एक हप्ताभित्र पत्ता लगाइ रिपोर्ट पेस गर्ने जानकारी दिएका छन् ।
सो टोलीमा एकजना विश्व स्वास्थ्य संगठनका प्रतिनिधि र चारजना जनस्वास्थ्य विज्ञ रहेको स्वस्थ्य मन्त्रालयले जानकारी दिएको छ ।
टोलीले संक्रमण फैलिएको भुल्केमै पुगेर अनुसन्धान थालिएको छ । गत शुक्रबार भुल्केस्थित एक मस्जिदमा रहेको १६ जनामध्ये १२ जनामा कोरोना पुष्टि भएको थियो ।
बाँकी चारजनामा पछि संक्रमण पुष्टि भएपछि सो क्षेत्रलाई उच्च जोखिमको रुपमा लिइएको छ ।
अहिले उदयपुरको भुल्केमा मात्र २८ जना कोरोना संक्रमित फेला परेका छन् । उनीहरूको विराटनगरस्थित कोरोना अस्पतालमा उपचार भइरहेको छ ।
गत शुक्रबारदेखि नै भुल्के बस्ती सिल गरिएको छ । बस्तीमा खाद्यवस्तुदेखि सबै कुरा नगरपालिकाले व्यवस्था गर्दै आएको छ ।
