काठमाडौँ । दक्षिण एसियाली सहयोग संगठन (सार्क)का सदस्य राष्ट्रहरू पनि यतिबेला कोरोना संक्रमणविरुद्धको अभियानमा छन् ।

प्राय सबैजसो देशमा लकडाउन छ । भूगोल र जनसंख्या दुवै आधार ठुलो देश भारतमा संक्रमण विस्तार हुँदै गएको छ । त्यहाँ मृत्यु पनि सर्वाधिक छ । सुरुमा पाकिस्तानमा बढी संक्रमण देखिए पनि पछिल्ला दिनहरुमा भारतमा मृत्यु र संक्रमण बढ्दै गएको हो । भारतमा संक्रमणको अवस्था नियन्त्रणमा हुँदा नेपालका लागि पनि सहज अवस्था हो । भारतसँगको खुला सीमानाका कारण कोरोना संक्रमणको फैलावट पनि परनिर्भर जस्तै बनेको छ । शुक्रबार प्रधानमन्त्री केपी शर्मा ओली र भारतीय समकक्षी नरेन्द्र मोदीबीच कोरोना संक्रमण नियन्त्रणबारे टेलिफोन वार्ता भएको थियो । सो वार्तामा पनि सीमामा आवतजावत नियन्त्रण गर्ने विषयमा पनि छलफल भएको थियो ।

सार्क सदस्य मुलुकमध्ये सबैभन्दा कम संक्रमित भुटानमा छन् । भुटानमा ५ जना संक्रमित देखिएकोमा २ जना ठीक भइसकेका छन् ।

यो समाचार तयार पार्दासम्म भारताम ८ हजार ५०४ जना संक्रमित पुष्टि भइसकेको छ । त्यहाँ २८९ जनाको मृत्यु भएको छ भने ९७२ जना उपचारपछि ठीक भएका छन् ।

त्यसपछि पाकिस्तानमा ५ हजार ३८ जना संक्रमित भएका छन् । त्यहाँ ८६ जनाको ज्यान गइसकेको छ ।

माल्दिभ्स, नेपाल र भुटानमा अहिलेसम्म मानवीय क्षति भएको छैन ।

यस्तो छ सार्क सदस्य मुलुकको अवस्था