चीनको वुहानमा पहिलोपटक देखिएको नयाँ कोरोना भाइरसको सङ्क्रमण अहिले विश्वमै चिन्ता र खतराको विषय बनेको छ ।

७१ दिनअघि माघ ८ गते यसको सङ्क्रमण ५ सय ५५ जनामा देखिएको थियो । यो चीनमा मात्रै सीमित थियो । यतिबेलासम्ममा १७ जनाले ज्यान गुमाइसकेका थिए ।

त्यसयता निरन्तर यो सङ्ख्या बढ्ने क्रममा छ । माघ ९ गते १ जना, १० गते ८ र ११ गते १६ जनाको ज्यान कोरोना भाइरसले लिएको थियो ।

यसबीचमा हरेक दिनजसो मृत्युको सङ्ख्या अघिल्लो दिनको तुलनामा बढेको छ । अपवादमा मात्र सङ्ख्या घटेको पाइन्छ । माघ १२ गते अघिल्लो दिनको तुलनामा दुई जना कम अर्थात् १४ जनाको मृत्यु भएको थियो । त्यस्तै माघ १४ गते ४९ जनाको मृत्यु भएकोमा १५ गते २ जनाको ज्यान कोरोना भाइरसले लियो । माघ १९ मा १०३ जना मरेकोमा २० गते ६४ मा झर्‍यो ।  

माघकै २८ गते १०० जनाले ज्यान गुमाए । भोलिपल्ट माघ २९ मा भने यो सङ्ख्या निक्कै घटेर ५ जनामा खुम्चियो । तर फागुन १ गते नै २५३ जनाले ज्यान गुमाएको समाचार सुन्नु पर्‍यो ।

फागुन २ गते यो मृत्युको सङ्ख्या अलि घटेर १५२ मा पुग्यो । त्यसपछि फागुन २४ सम्म औसतमा एक सय जनाको हाराहारीले ज्यान गुमाए ।

फागुन २५ पछि कोरोना भाइरसबाट मृत्यु हुनेको सङ्ख्या फेरि बढ्यो । त्यो दिन २४४ जनाले ज्यान गुमाएको दुखद खबर आयो । त्यसयता विश्वभर दैनिक मृत्युको सङ्ख्या तीन सयभन्दा खासै तल आएन ।

चैत महिना त विश्वलाई अझै फापेन । तीन अङ्कमा सीमित मृत्यु चैत ६ देखि ४ अङ्कमा पुग्यो । चैत ६ गते एक हजार १३४ जनाले ज्यान गुमाए । त्यसयता मृत्युको सङ्ख्या कहिल्यै तीन अङ्कमा झरेन ।

चैत ११ देखि मृत्युको सङ्ख्याले दैनिक दुई हजारको आँकडा पार गर्‍यो भने १५ गतेदेखि तीन हजारको आँकडा पार गरेको छ । पछिल्लो १० दिनमा करिब २७ हजारको ज्यान गएको छ । मंगलबारमात्रै ४ हजार ३३७ जनाको मृत्यु भयो ।

संक्रमणतर्फ पनि यसैगरी आँकडा बढ्ने क्रममा छ ।

हेर्नुस् दैनिक मृत्यु र सङ्क्रमण :