नयाँ कोरोना भाइरस (कोभिड १९) सङ्क्रमणको असर विश्वव्यापी रूपमा फैलिरहेको छ । सङ्क्रमणबाट मृत्यु हुनेको सङ्ख्या ३८ हजार नाघेको छ ।

चीनमा नियन्त्रणउन्मुख रहेको बताइए पनि दक्षिण कोरियालगायतका केही मुलुकबाहेक सबैमा यो सङ्क्रमण द्रुत गतिमा फैलिएको छ ।

सोमबारमात्र विश्वभर ६१ हजारभन्दा बढी सङ्क्रमित थपिएका छन् । त्यस्तै सोमबारनै ३ हजार ७१८ जनाको मृत्यु भएको छ । कोरोना सङ्क्रमणबाट २०१ वटा मुलुक प्रभावित भएका छन् ।

नेपाली समयअनुसार मङ्गलवार अपरान्हसम्म ३८ हजार एक सयभन्दा बढीले ज्यान गुमाएका छन् । सबैभन्दा बढी फैलावट अमेरिकामा देखिएको छ । एकैदिनमा अमेरिकामा २० हजार ३५३ सङ्क्रमित बढ्दा स्पेनमा ७ हजार ८४६ जना बढेका छन् । इटालीमा थप ४ हजार ५० जनामा संक्रमण पुष्टि भएको छ ।

सङ्क्रमितको सङ्ख्या अमेरिकामा सबैभन्दा बढी भए पनि मानवीय क्षति भने इटालीमा सबैभन्दा बढी छ । इटलीमा ११ हजार ५९१ जनाको मृत्यु भइसकेको छ । त्यहाँ एक लाख एक हजार ७३९ जनामा सङ्क्रमण देखिएको छ ।

स्पेनले पनि कोरोना सङ्क्रमणको भारी मूल्य चुकाउनु परेको छ । स्पेनमा अहिलेसम्म ७ हजार ७१६ जनाको मृत्यु भएको छ भने करिव ८८ हजारलाई सङ्क्रमणको पुष्टि भएको छ ।

नियन्त्रणनजिक पुगेको चीनमा पछिल्लो एक दिनमा पाँच जनाको मृत्यु भएको छ । त्यहाँ अहिलेसम्म ३ हजार ३ सय जनाको ज्यान गुमेको छ । चीनमा ८१ हजार ४३९ जनामा कोरोना भाइरस सङ्क्रमण भएको जानकारी एजेन्सीहरूले दिएका छन् ।

यस्तै फ्रान्समा कोरोना सङ्क्रमणबाट ३ हजार २४ जनाको मृत्यु भइसकेको छ । त्यहाँ ४४ हजार ५५० जना सङ्क्रमित छन् । उता ४१ हजारभन्दा बढी सङ्क्रमित भएको इरानमा २ हजार ७५७ जनाको ज्यान गएको छ ।

फ्रान्स र इरानभन्दा बढी सङ्क्रमित भएको जर्मनीमा ६४५ जनाको ज्यान गइसकेको छ । त्यहाँ झन्डै ६७ हजारमा सङ्क्रमणको पुष्टि भइसकेको छ ।

युरोपेली मुलुक नेदरल्यान्ड्समा ८६४, बेल्जियममा ५१३ र स्विट्जरल्यान्डमा ३५९ जनाको कोरोना भाइरसको सङ्क्रमणबाट मृत्यु भइएको छ ।

कोरोना सङ्क्रमणबाट बढी मानवीय क्षति भएका देशहरू :

अहिलेसम्ममा नेपालमा पाँच जनामा कोरोना सङ्क्रमणको पुष्टि भएको छ । त्यसमध्ये एक जना निको भइसकेका छन् । ४ जनाको उपचार जारी छ । उनीहरूको अवस्था सामान्य रहेको बताइएको छ । अहिलेसम्म कोरोना सङ्क्रमणको लक्षण देखिएका ९९३ जनाको परीक्षण गरिएको छ । ५ जनाबाहेक सबैलाई कोरोना भाइरसको सङ्क्रमण नभएको पुष्टि भएको हो ।

छिमेकी मुलुक भारतमा कोरोनाबाट ३२ जनाको मृत्यु भएको छ । केही भारतीय सञ्चारमाध्यमले ३६ जनाको मृत्यु भएको जनाएका छन् । त्यहाँ एक हजार २५१ जनामा सङ्क्रमणको पुष्टि भएको छ ।

सार्क सदस्य मुलुकहरूमा पाकिस्तानमा सबैभन्दा बढी सङ्क्रमित भेटिएका छन् । त्यहाँ १ हजार ७१७ जनामा कोरोना भाइरस सङ्क्रमण पुष्टि भएको छ । त्यहाँ २१ जनाको मृत्यु भइसकेको छ ।

नेपाल, माल्दिभ्स र भुटानबाहेक सार्कका पाँचवटै मुलुकमा मानवीय क्षति भइसकेको छ । बङ्गलादेशमा ५, अफगानिस्तानमा ४ र श्रीलङ्कामा २ जनाको कोरोना सङ्क्रमणबाट मृत्यु भएको पुष्टि भएको छ । सबैभन्दा कम सङ्क्रमित भुटानमा ४ जना भेटिएका छन् ।