विश्वव्यापी महामारीको रूप लिएको नयाँ कोरोना भाइरसको सङ्क्रमणबाट सोमबार मध्यान्नसम्म ३० हजारभन्दा बढीले ज्यान गुमाएका छन् । अमेरिकामा यो भाइरसको संक्रमण तीव्र गतिमा फैलिरहेको छ ।

मृत्युको आधारमा अहिलेसम्म सबैभन्दा बढी क्षति इटालीले व्यहोरेको छ । इटलीमा १० हजार ७७९ जनाको मृत्यु भइसकेको छ । त्यहाँ ९८ हजारको हाराहारीमा सङ्क्रमण फैलिएको छ । यो बढ्ने क्रममा छ ।

त्यसैगरी अहिलेसम्म स्पेनमा ६ हजार ८०३ जनाको मृत्यु भएको छ । त्यहाँ ८० हजारभन्दा बढीलाई कोरोना भाइरसको सङ्क्रमण भएको छ ।

नियन्त्रणनजिक पुगेको चीनमा पनि अहिलेसम्म ३ हजार ३०४ जनाको ज्यान गुमेको छ । सोमबारमात्र चार जना थपिएका हुन् । चीनमा ८१ हजारभन्दा बढी कोरोना भाइरसबाट सङ्क्रमित छन् ।

फ्रान्स र इरानभन्दा निक्कै बढी सङ्क्रमित भएको जर्मनीमा ५४१ जनाको ज्यान गइसकेको छ । त्यहाँ ६२ हजार ४३५ जनामा सङ्क्रमणको पुष्टि भइसकेको छ ।

कोरोना भाइरसबाट नेदरल्यान्ड्समा ७७१, बेल्जियममा ४३१ र स्विटजरल्यान्डमा ३०० जनाको मृत्यु भएको छ ।

एक हजारभन्दा बढी नागरिको मृत्यु भएको देशहरू :

अहिलेसम्म कोरोना भाइरसको सङ्क्रमण विश्वका दुई सय मुलुकमा फैलिएको छ ।

यति बेलासम्ममा नेपालमा पाँच जनामा कोरोना सङ्क्रमणको पुष्टि भएको छ । त्यसमध्ये एक जना निको भइसकेका छन् । ४ जनाको उपचार जारी छ । अहिलेसम्म ९७१ जनाको कोरोना परीक्षण गरिएकोमा ५ जनाबाहेक सबैलाई कोरोना भाइरसको सङ्क्रमण नभएको पुष्टि भएको हो ।

खुला सीमाना रहेको दक्षिणको छिमेकी भारतमा कोरोनाबाट २९ जनाको मृत्यु भएको छ । त्यहाँ एक हजार ७१ जनामा सङ्क्रमणको पुष्टि भएको छ ।

सार्क सदस्य मुलुकहरूमध्ये पाकिस्तानमा सबैभन्दा बढीमा सङ्क्रमण देखिएको छ । पाकिस्तानमा १ हजार ६२५ जनामा कोरोना भाइरस सङ्क्रमण पुष्टि भएको छ । त्यहाँ १८ जनाको मृत्यु भइसकेको छ ।

नेपाल, माल्दिभ्स र भुटानबाहेक सार्कका पाँचवटै मुलुकले मानवीय क्षति व्यहोरिसकेका छन् ।