स्याङ्जा । स्याङ्जाको गल्याङ नगरपालिका–१ राम्दीमा पाँच हजारभन्दा बढीको स्वास्थ्य परीक्षण गरिएको छ । गण्डकी प्रदेश र पाँच नम्बर प्रदेशको सिमानामा रहेको राम्दीमा नगरपालिकाले हेल्थ डेस्क स्थापना गरेर स्वास्थ्य परीक्षण गर्दै आएकोमा अहिलेसम्म पाँच हजार २५१ जनाको स्वास्थ्य परीक्षण गरिएको नगरपालिकाले जनाएको छ ।
यसैबीच वालिङ नगरपालिका–१ रामबाच्छाका युवा व्यवसायी किरण ठकुरीले नगरपालिकाभित्र रहेका १७ वटा स्वास्थ्य चौकी, वडा प्रहरी कार्यालय, सशस्त्र प्रहरी र फेदीखोला गाउँपालिका–१ मा रहेको अमोर सेवा नेपाल बालगृहका लागि एक लाख रुपैयाँ बराबरको स्यानिटाइजर, मास्क र पञ्जा सहयोग गरेका छन् ।
वालिङमा विधान स्पोर्ट्स हाउस सञ्चालन गर्दै आएका व्यवसायी ठकुरीले आफ्नो छोरा विधानको जन्मदिनको अवसर पारेर उक्त सहयोग गरेका हुन् ।
विश्वरभर महामारीका रूपमा फैलिएको कोरोना भाइरस संक्रमणबाट सबै त्रसित भइरहेका बेला छोराको जन्मदिनमा अन्य कार्य गर्नुभन्दा जनताको उपचारमा खटिने स्वास्थ्यकर्मी र सुरक्षामा खटिने प्रहरीका लागि सहयोग गर्न उपयुक्त लागेर जन्मदिन मनाउने खर्चले सो सामग्री सहयोग गरेको ठकुरीले बताए ।
