काठमाडौं–पशुपतिनाथ क्षेत्रमा भगवान् शिवको पूजा तथा दर्शनका लागि विशेष रुपमा लिइने साउने सोमबार यो वर्ष अघिल्ला वर्षको जस्तो विशेष नहुने भएको छ । पशुपति क्षेत्रमा भक्तजनले आफू उपस्थित भएर दर्शन तथा पूजा आराधना गर्न यो वर्ष पाउने छैनन् ।
कोरोना भाइरसको महामारीका कारण लागू भएको लकडाउन र मानिसहरु भेला हुन नपाउने सरकारी नियमका कारण सर्वसाधारणका लागि पशुपतिनाथ मन्दिर खुला नगरिएको पशुपति क्षेत्र विकास कोषले जनाएको छ । साउनको पहिलो सोमबार (भोलि साउन ५ गते) का लागि विशेष व्यवस्था नगरिएको पशुपति क्षेत्र विकास कोषले जनाएको छ ।
कोषका प्रवक्ता भोला सिटौलाका अनुसार साउने सोमबार पनि नित्य पूजा मात्रै हुने र दर्शनार्थीका लागि खुला गरिने छैन । उनले भने, ‘अहिलेको परिस्थिति विषम छ । सरकारले लागु गरेको नियम मान्नु हाम्रो पहिलो प्राथमिकता हो । सरकारले मठ मन्दिर खुला गर्ने स्वीकृति दिएको छैन । सोही कारण यो वर्षको साउने सोमबार पशुपतिनाथ भक्तजनका लागि खुला हुँदैन ।’
उनले थप प्रष्ट पार्दै भनेका छन्, ‘अहिले मन्दिर बन्द छ । सोमबार पनि खुला हुँदैन । तर सरकारले मन्दिर खुला गर्ने निर्णय गरेमा साउनका अरु सोमबार दर्शन गर्न पाइने हुन सक्छ । त्यसका लागि हामीले तयारी गरेका छौँ ।’ त्यसका लागि भौतिक दूरी कायम हुने गरी लाइन बस्ने व्यवस्था मिलाउन गोलो घेरा बनाइएको उनले जानकारी दिए ।
मन्दिर खुला भएपछि पनि सरकारी मापदण्ड अनुसार काम हुने बताउँदै उनले पश्चिम गेटको सानो द्वारबाट पस्ने र ठूलो गेटबाट निस्कने गरी तयारी गरिएको जानकारी दिएका छन् । मन्दिर खुलेपछि पहिलो प्राथमिकता दर्शनका लागि दिइने कोषले जनाएको छ । त्यसपछि मात्रै विशेष पूजाको व्यवस्था हुनेछ ।
गत वर्ष साउनको पहिलो सोमबार झण्डै एक लाख दर्शनार्थीले पशुपतिको दर्शन गरेको भए पनि यो वर्ष घरबाटै मनले सम्झेर पूजा गर्न आग्रह कोषले गरेको छ । मन्दिर परिषरमा पस्न नपाए पनि बाहिरबाट गजुरको दर्शन गर्न चाहनेले आफू अनुकुल व्यवस्था गर्न सक्ने जनाइएको छ ।
यो वर्षको पहिलो साउने सोमबार औँसी पनि परेकाले थप विशेष महत्व छ । दर्शनको व्यवस्था नभए पनि नित्यसँगै औँसीको विशेष पूजा मन्दिरका भट्टहरुले गर्ने कोषले जनाएको छ ।
