नेपाली बजारमा सुनको मूल्य अहिलेसम्मकै उच्च विन्दुमा पुगेको छ।

नेपाल सुनचाँदी व्यवसायी महासङ्घका अनुसार बिहीबार सुनको भाउ इतिहासकै सबैभन्दा उच्च मूल्यमा पुगेको हो। महासङ्घका अनुसार आज छापावाल सुनको मूल्य प्रतितोला १ हजार २ सय रुपैयाँले बढेर १ लाख ७ हजार ५ सय रुपैयाँमा पुगेको छ। यसअघि गएको १२ गते सुनको मूल्य बढेर तोलामा १ लाख ६ हजार ९ सय रुपैयाँमा पुगेको थियो। यस्तै, तेजाबी सुनको मूल्य पनि प्रतितोला १ लाख ७ हजार पुगेको छ।

यसैगरी, आज चाँदीको मूल्य पनि बढेको छ। चाँदी बुधवारको तुलनामा प्रतितोला २५ रुपैयाँले बढेर आज १ हजार ३ सय ९५ रुपैयाँमा कारोबार भइरहेको छ। अन्तर्राष्ट्रिय बजारमा नै सुनको मूल्य बढेकाले नेपालमा पनि महँगो भएको नेपाल सुन चाँदी व्यवसायी महासङ्घले जनाएको छ।