माछा मार्ने क्रममा करेन्ट लागेर कैलालीमा १ जनाको मृत्यु भएको छ । मंगलबार बिहान जानकी गाउँपालिका–१ भुर्सा बस्ने साहानु चौधरीका २१ वर्षीय छोरा प्रकाश चौधरीको मृत्यु भएको हो ।
कर्णाली नदीबाट आएको नहरमा माछा मार्ने क्रममा करेन्ट लागेर उनको मृत्यु भएको जिल्ला प्रहरी कार्यालय कैलालीले जनाएको छ ।
करेन्ट लागेर बेहोस भएका उनलाई उपचारका लागि टीकापुर अस्पतालमा लगिएकोमा अस्पतालमै मृत्यु भएको जिल्ला प्रहरी कार्यालय कैलालीका प्रहरी नायव उपरिक्षक दक्षकुमार बस्नेतले बताए ।
सोधपुछका लागि मृतकसँगै माछा मार्न गएका स्थानीय २५ वर्षीय हरि चौधरी, २० वर्षीय निराजंन चौधरी, २५ वर्षीय देव चौधरी र २२ वर्षीय दीपेश चौधरीलाई नियन्त्रणमा लिइएको उनले बताए ।
