काठमाडौं । अर्जेन्टिनाबाट विश्वकप जित्दा पेरिस सेन्ट जर्मेन पीएसजीले आफुलाई सम्मान नगरेको  लियोनल मेस्सीले बताएका छन् । अर्जेन्टिना टिमका खेलाडीलाई उनीहरु आबद्ध सबै क्लबले सम्मान गरेपनि आफुलाई सो सम्मान पीएसजीले नदिएको मेस्सीको भनाइ छ ।  

विश्वकपको फाइनलमा मेस्सीले दुई गोल गरेका थिए । साथै पेनाल्टी सुटआउटमा अर्जेन्टिनाले ४–२ को जित निकाल्दा मेस्सीले समेत गोल गरेका थिए । फ्रान्सलाई हराउँदै अर्जेन्टिनाले कतार विश्वकप फुटबलको उपाधि जितेको थियो । ‘म ती २५ मध्य एकमात्र खेलाडी थिए । जसलाई क्लबले सम्मान गरेन ।’ मेस्सीले पछिल्लो एक अन्तरवर्तामा भनेका छन् । 
‘म बुझ्छु, हाम्रै कारण हुनुपर्छ । 

गत जुनमा सम्झौता सकिएपछि मेस्सीले पीएसजी छाडेका थिए । उनले पीएसजीको बसाई सुखद रहन नसकेको बताए । उनले प्रशंसकको एउटा समूहसँगको मतभेदका कारण फ्रान्स बसाई कठिन बनेको उल्लेख गरे ।

मेस्सीले अमेरिकाको इन्टर मियामीमा मज्जा लिईरहेको बताएका छन् । 

‘म जे गर्छु, प्रेमले गर्छु । म खेल्न मन पराउँछु । र अहिले यो फरक तरिकाबाट भैरहेको छ । मियामी आउने निर्णय लिनुको कारण खास यो पनि हो । सोही कारण अरु ठाउँमा मैले निरन्तरता दिईन । यसलाई फरक तरिकाले अनुभव गर्न खोजिरहेको छु ।’ 

मेस्सीको मियामीसँगको सम्झौता सन् २०२५ को डिसेम्बरसम्म छ । उनले तत्काल सन्यासको विषयमा नसोचेको समेत बताएका छन् । 

‘मैले सन्यासको विषयमा सोचेको छैन । म यो सोच्न पनि चाहन्न । म यसलाई निरन्तरताका साथ मजा लिन चाहन्छु । मैले युरोप छाड्ने महत्वपुर्ण निर्णय लिए र यहाँ आएको छु । म अर्को कदमको विषयमा सोच्न चाहन्न ।’ मेस्सीले भने ।

मेस्सीले सन् २०२४ को कोपा अमेरिका खेल्ने समेत पक्का गरेका छन् । उनले सन् २०२६ को विश्वकपको विषयमा भने अनविज्ञता देखाएका छन् । कोपा अमेरिका अमेरिकाले सन् २०२४ मा आयोजना गर्दैछ । 

सन् २०२६ मा अमेरिकाले क्यानडा र मेक्सिकोसँग मिलेर विश्वकप आयोजना गर्दैछ । त्यसैको तयारी स्वरुप अमेरिकाले कोपा अमेरिका आयोजना गर्न लागेको हो ।