अर्जेन्टिनी कप्तान लियोनल मेस्सीले आफ्नो २१ वर्षको बार्सिलोना यात्रालाई पुर्णविराम लगाइसकेका छन् । उनी २००० देखि २०२१ सम्म बार्सिलोनाको जर्सिमा देखिए भने उनले बार्सिलोना क्लबको साथमा कयौं रेकर्डहरू बनाए । उनी अहिले लिग वान क्लब पीएसजीमा अनुबन्ध भएका छन् । 

मेस्सी बार्सिलोनाका लागि सर्वाधिक खेल खेल्ने र सर्वाधिक गोल गर्ने खेलाडी हुन् । उनले बार्सिलोना करियरमा ७७८ खेलमा ६७० गोल गरेका छन् भने ३५ उपाधि  जितेका छन् ।

उनले बार्सिलोना क्लबकोे साथमा अन्य थुप्रै रेकर्डहरू पनि बनाएका छन् । तर बार्सिलोनाबाट बार्हिगमनसँगै मेस्सी केही महत्वपुर्ण रेकर्ड बनाउन भने चुकेका छन् । 

मेस्सीले बार्सिलोनाको साथमा बनाउन नसकेका केही रेकर्डहरू :

१. एउटै क्लबका लागि सर्वाधिक उपाधि

मेस्सीले बार्सिलोनाको साथमा ३५ उपाधि जितेका छन् र उनी एउटै क्लबका लागि सर्वाधिक उपाधि जित्ने दोश्रो खेलाडी हुन् । बार्सिलोनाबाट गएसँगै मेस्सीले म्यानचेस्टर युनाइटेडका र्यान गिग्सको एउटै क्लबका लागि ३६ उपाधि जित्ने रेकर्ड तोड्न असफल भएका हुन् । 

२.सर्वाधिक ला लिगा उपाधि

मेस्सीले आफ्नो १७ वर्षे करियरमा १० ला लिगाको उपाधि जितेका छन् । उनी सर्वाधिक ला लिगा जित्ने मामिलामा रियल मड्रिडका पूर्वखेलाडी पिर्रीसँग एउटै सूचीमा छन् ।

तर रियल मड्रिडकै अर्का लिजेण्ड खेलाडी पाको जेन्टो भने सर्वाधिक ला लिगा उपाधि चुम्ने सुचिमा अग्रस्थानमा छन् । जेन्टोले आफ्नो करियरमा १२ ला लिगा उपाधि जितेका छन् । 

३. बार्सिलोनाबाट सर्वाधिक च्याम्पियन्स लिग खेल्ने खेलाडी

मेस्सीले बार्सिलोनाको साथमा १४९ च्याम्पियन्स लिग खेल खेलेका छन् भने उनी सर्वाधिक च्याम्पियन्स लिग खेल्ने बार्सिलोनाकोे दोश्रो खेलाडी हुन् ।

बार्सिलोनाबाट सर्वाधिक च्याम्पियन्स लिग खेल्ने रेकर्ड जावी हर्नान्डेजको नाममा रहेको छ । जावीले समग्रमा १५१ च्याम्पियन्स लिग खेल खेलेका छन् । बार्सिलोनाबाट बाहिरिएसँगै मेस्सीले त्यो रेकर्ड समान गर्ने मौका पनि गुमाएका छन् ।

४. कोपा डेल रेमा सर्वाधिक गोल

मेस्सी कोपा डेल रेको इतिहासमा सर्वाधिक गोल गर्ने चौथो खेलाडी हुन् । उनले कोपा डेल रेमा ५६ गोल गरेका छन् । कोपा डेल रेमा सर्वाधिक गोल गर्ने रेकर्ड एट्लेटिको बिल्बाओका खेलाडी टेल्मो जर्राको नाममा रहेको छ उनले कोपा डेल रेमा ८१ गेल गरेका थिए ।

सुचिको दोश्रो स्थानमा बार्सिलोनाका जोसेप सेमिटाएर ७० गोल,तेश्रो स्थानमा भ्यालेन्सियाका गोरोस्टिजा ६४ गोल रहेका छन् । मेस्सी बार्सिलोनाका लागि भने कोपा डेल रेमा सर्वाधिक गोल गर्ने दोश्रो खेलाडी हुन् ।