युरोकप फुटबलको उपाधि इटलीले जित्यो, तर इङल्यान्डका २५ वर्षीय लेफ्ट ब्याक लुक शाले फाइनल खेलमा नयाँ रेकर्ड बनाए ।
खेलको १ मिनेट ५७ सेकेन्डमा ट्रिपरको पासमा गोल गर्दै लुक शाले घरेलु टोलीलाई अग्रता दिलाएका थिए, इङल्यान्डको जर्सीमा यो उनको पहिलो गोल थियो ।
युरोकपको फाइनल खेलमा यो नै सर्वाधिक छिटो गोल हो । यसअघि १९६४ को फाइनलमा स्पेनका चुस पेरेडाले ५ मिनेट १७ सेकेन्डमा गोल गरेका थिए । लुईस सुआरेजको क्रसमा परेडाले गरेको गोलको कीर्तिमान ५७ वर्षपछि ब्रेक भएको हो ।
फाइनलमा छिटो गोल गर्ने कीर्तिमान शाको नाममा रहेपनि युरोमा छिटो गोल गर्ने कीर्तिमान दिमिट्री किरिचेन्कोको नाममा छ । ग्रिसविरुद्धको खेलमा सन् २००४ मा किरिचेन्कोले रुसका लागि एक मिनेट सात सेकेन्डमा गोल गरेका थिए ।
तर, व्यक्तिगत रेकर्डका बाबजुद शाले खुसी मनाउन भने पाएनन् । ६७ मिनेटमा इटलीका लियोनार्दो बनुचीले खेल बराबरी गरे । त्यसपछि निर्धारित र अतिरिक्त समयमा कुनै गोल भएन । अन्त्यमा, पेनाल्टी सुटआउटमा इटली ३-२ ले विजयी भयो ।
