काठमाडौं । स्वीट्जरल्याण्ड र फ्रान्सबीच गएराति भएको खेलमा पेनाल्टी चुकाएपछि फ्रान्सका स्ट्राइकर किलियन एमबाप्पेले माफी मागेका छन् ।
निर्धारित समय र अतिरिक्त समयको खेल ३–३ गोलको बराबरीमा सकिएपछि पेनाल्टी सुटआउटबाट निर्णय भएको हो । जसमा एमबाप्पेले प्रहार गरेको बल स्वीस गोलकिपर यान सोमेरले बचाए ।
यसपटक युरोमा एमबाप्पेले एक गोल पनि गर्न सकेनन् । पेनाल्टी पनि गुमाएपछि उनले माफी मागेका हुन् । एमबाप्पेले आफूले टिमलाई सहयोग गर्न चाहेको तर सफल नभएको बताए ।
‘पेनाल्टीको लागि म माफी माग्छु । म टिमलाई सहयोग गर्न चाहन्थें तर म फेल भएँ ।’ एमबाप्पेले यसबाट फ्यानहरुलाई निराश बनाए पनि उनीहरुको समर्थनका लागि आभार व्यक्त गरे । ‘फ्यानहरुलाई निराश बनाएका छौं । तर तपाईंहरुको समर्थन र हामीप्रति देखाएको विश्वासका लागि धन्यवाद ।’
स्वीट्जरल्याण्डले फ्रान्सलाई पेनाल्टी सुटआउटमा ५–४ ले पराजित गरेको हो । जितपछि स्वीट्जरल्याण्ड क्वाटरफाइनलमा प्रवेश गर्दा फ्रान्स बाहिरियो ।
प्रतियोगिताअघि फ्रान्स उपाधिको सबैभन्दा ठूलो दाबेदार भए पनि फ्रान्स अन्तिम १६ बाटै घर फर्कन बाध्य भयो ।
यता स्वीट्जरल्याण्डले भने ६७ वर्षपछि मुख्य प्रतियोगितामा नकआउट चरणको खेल जितेको हो ।
