मंगलबार राति जर्मन क्लब आरबी लाइप्जिग र फ्रेन्च क्लब पेरिस सेन्ट जर्मेन (पीएसजी) बीच यूईएफए च्याम्पियन्स लिगअन्तर्गत पहिलो सेमिफाइनल खेल हुँदैछ ।
खेल पोर्चुगलको लिस्वनमा नेपाली समयअनुसार राति १२ः४५ बजेपछि सुरु हुँदैछ । पीएसजी २५ वर्षपछि सेमिफाइनलमा प्रवेश गरेको हो भने लाइप्जिग क्लब इतिहासमै पहिलोपटक अन्तिम चारमा पुग्न सफल भएको छ । त्यसैले दुवै टोली पहिलोपटक फाइनल पुग्ने दाउमा छन् ।
विश्व फुटबलका दुई स्टार खेलाडीहरु ब्राजिली नेयमार र फ्रेन्च युवा फरवार्ड केलियन एमबप्पेको साथ पाएको पीएसजी उच्च मनोबलका साथै मैदान उत्रनेछ ।
यता छोटो समयमै उच्च नतिजा निकालिरहेको आरबी लाइप्जिग पनि पीएसजीलाई स्तब्ध पार्दै पहिलोपटक फाइनल प्रवेश गर्दै इतिहास बनाउन चाहान्छ । लाइप्जिगकका लागि युसुफ पउलसेन, ड्यानिय ओल्मो, क्रिस्टोफेर एनकुन्कु, मार्सेल सवित्जर, एन्जेलिनो र गोलरक्षक पिटर गुलाक्सी रहनेछन् ।
यि दुई टोली दोस्रोपटक आमने–सामने हुन लागेको हुन् । यसअघि सन् २०१४ मा भएको मैत्रीपूर्ण खेलमा लाइप्जिग ४–२ ले विजयी भएको थियो । यस खेलमा विजयी हुने टोलीले उपाधिका लागि आइतबार राति लियोन र बायर्न म्युनिखबीचको विजेतासँग प्रतिस्पर्धा गर्नेछ ।
