माइभ्याली गोल्डकपको छैटौं संस्करणको उपाधि मछिन्द्र क्लबले जितेको छ ।
शनिबार ईलामको टुँडिखेलमा भएको फाइनलमा आयोजक माइभ्याली क्लबलाई १–० गोल अन्तरले पराजित गर्दै मछिन्द्रले उपाधि उचालेको हो । अतिरिक्त समयमा विदेशी खेलाडी आन्द्रेस नियाले मछिन्द्रका लागि विजयी गोल गरे ।
मछिन्द्रले पहिलो पटक माइभ्याली गोल्डकपको उपाधि उचालेको हो । दुवै टिम पहिलो पटक फाइनल पुगेका थिए ।
मछिन्द्रले सिजनको तेस्रो उपाधि हात पारेको छ । मोफसलमा भने मछिन्द्रको यो दोस्रो गोल्डकप उपाधि हो ।
उसले यसअघि झापामा भएको सताक्षी गोल्डकपको उपाधि जितेको थियो । उपाधिसंगै मछिन्द्रले ८ लाख रुपैयाँ प्राप्त गरेको छ । उपविजेता आयोजकले ५ लाख रुपैयाँमा चित्त बुझाएको छ ।
