![](/static/home/images/logos/nepalflash-logo.png?v=1.3.0)
काठमाडौं । उद्धार उडानका लागि कुनै बन्देज नगरिएको नेपाल नागरिक उड्डयन प्राधिकरणले जनाएको छ । प्राधिकरणले केही दिनअघि सुरक्षाका लागि भन्दै उडानमा कडाइ गरेको थियो । प्राधिकरणको यो निर्णयको चौतर्फी आलोचना हुँदै आएको छ ।
प्राधिकरणका प्रवक्ता जगन्नाथ निरौलाले मनसुन अवधिका लागि अपरेसन आवरभित्र मात्रै उडान गर्नेगरी निर्णय भएको र मौसम अनुकूल उद्धार उडानमा कुनै बन्देज नगरिएको बताएका छन् । दुर्गम क्षेत्रको व्यावसायिक उडानमा अपरेसन आवर लागू गरिएको तथा उद्धार उडानका लागि बन्देज नरहेको उनको आशय छ ।
मौसम प्रतिकूल हुँदा दुर्घटनाको जोखिम बढ्नसक्ने भन्दै अपरेसन आवरमा मात्रै उडान गर्न प्राधिकरणले आन्तरिक उडानका एअरलाइन्सलाई सर्कुलर गरेको थियो । प्राधिकरणका अनुसार सामान्यतः दुर्गम क्षेत्रका विमानस्थलमा बिहान साढे ६ बजेदेखि दिउँसो साढे १२ बजेसम्मको समयावधिलाई ‘अपरेसन आवर’ मानिन्छ ।
दिउँसो साढे १२ बजेपछि उडान भर्न नपाउने नियमका कारण दुर्गम क्षेत्रका यात्रु र बिरामीले सास्ती खेप्दै आएका छन् । जिल्ला अस्पताल हुम्लाले नेपालगञ्ज र रेफर गरेका सिमकोट गाउँपालिका–६ का सुरज सुनारका ६ महिने छोरा इमरानलाई तत्कालै अस्पताल लैजान नसक्दा अस्ति बिहीवार ज्यान गएको थियो ।
हुम्लाका सहायक प्रमुख जिल्ला अधिकारी अमृतप्रसाद सुवेदीका अनुसार बालकलाई झाडापखाला लागेको थियो । जिल्ला अस्पताल हुम्लाले थप उपचारका लागि नेपालगञ्ज रिफर गरेको थियो । तर, तत्काल नेपालगञ्ज लैजान जहाज नपाउँदा उनको ज्यान गएको थियो ।