काठमाडौं । सिलिन्डर ग्यास विस्फोटमा परी घाइते कांग्रेस नेता तथा प्रतिनिधिसभाका सदस्य चन्द्र भण्डारीलाई थप उपचारका लागि भारत लगिने भएको छ ।
हाल कीर्तिपुरको बर्न अस्पतालमा उपचाररत भण्डारीलाई चिकित्सकको सल्लाहअनुसार भारत लैजाने तयारी गरिएको हो ।
चिकित्सकका अनुसार, चन्द्रको फोक्सो र दाहिने भागमा बढी असर गरेको छ । यही असरलाई मध्यनजर गर्दै चिकित्सकले भारत लैजाने सल्लाह दिएका हुन् ।
घटनामा घाइते भण्डारीको आमाको पनि सोही अस्पतालमा उपचार भइरहेको छ । उनको अवस्था भने चिन्ताजनक रहेको बताइएको छ ।
भण्डारीको बुद्धनगरस्थित निवासमा बुधबार राति ग्यास सिलिन्डर विस्फोट भएको थियो । प्रहरीको प्रारम्भिक अनुसन्धानले असावधानीवश ग्यास खुला छाड्दा दुर्घटना हुन पुगेको देखाएको छ ।
