माओवादी केन्द्रका अध्यक्ष पुष्पकमल दाहाल प्रचण्ड सहभागी हुने कार्यक्रमलाई मध्यनजर गर्दै महोत्तरीको रामगोपालपुर गाउँपालिकाले आज दिएको सार्वजनिक बिदा रद्द गरेको छ । नगरप्रमुख अशोककुमार मण्डलले भूलबस प्रचण्ड आउने कार्यक्रमका लागि सार्वजनिक बिदाको सूचना हुन पुगेकाे बताएका छन् ।
यसअघि हिजो उनले गाउँपालिकामा निर्माण गरिएका स्वास्थ्य केन्द्रहरूको उद्घाटन गर्न पचण्ड आउन लागेको भन्दै सार्वजनिक बिदा दिइएको सूचना जारी गरेका थिए । उक्त सूचनामा जनाइए अनुसार रामगोपालपुर २, ३, ४, ६, ७, ८ र ९ मा निर्माण हुन लागेको आधारभूत स्वास्थ्य केन्द्रहरूको प्रचण्डले आज उद्घाटन गर्नेछन् ।
तर आज बिहान मेयर मण्डलले सार्वजनिक बिदा रद्द गरिएको बताउँदै सबै कार्यालयहरू खुल्ने जानकारी दिएका छन् । आज बिहान नयाँ सूचना जारी गर्दै उनले भूलबस सार्वजनिक बिदाको सूचना जारी भएको उल्लेख गरेका छन् । उनले समा चकेवा पर्वका अवसरमा नगरभित्रका विद्यालयहरू मात्रै आज बन्द रहने जनाएका छन् ।
