घर बनाउँदै गर्दा शौचालय कहाँ बनाउने भनेर सुरुमै योजना बनाइन्छ तर, करोडौँ लागतमा बनेकाे प्रदेश १ को प्रदेशसभा भवनमा शौचालय नै नभएकाे पाइएकाे छ । भवन निर्माण गर्दा शौचालयको परिकल्पना नगरिएको प्रदेशसभा सचिव गोपालप्रसाद पराजुलीले बताए । बैठक हल नजिकै रहेको सचिवालयको शौचालय प्रयोग हुने उनले बताए ।
शौचालय बिनाको अढाइ करोड बराबरकाे भवनको बुधबार मुख्यमन्त्री भीम आचार्यले उद्घाटन गरे । दुई करोड ५९ लाख रुपैयाँ लागतमा निर्माण भएको नयाँ भवनमा प्रदेशसभाको दिउँदे अधिवेशन शुरु हुँदैछ । नवौं हिउँदे अधिवेशनका लागि असोज २२ गते बैठक आह्वान गरिएको छ ।
भवन निर्माणको ठेक्का स्वामी नारायण निर्माण सेवाले पाएको थियो । सम्झौता अनुसार निर्माण भएको भवनको छानो फाइबरको छ । फाइबरको छाना केही समयअघि परेको असिनाले फुटेको थियो । प्रदेशसभा सचिव पराजुलीका अनुसार छाना फुटे पनि निर्माणकै क्रममा रहेकाले ठेकेदारले मर्मत गरेको बताए। नयाँ प्रविधि प्रयोग गरेको भन्दै उनले पछि छानो फेर्नुपर्ने अवस्था आउन सक्ने बताए ।
पराजुलीका अनुसार बैठक हलमा १६ लाख ४३ हजारको फर्निचर जडान गरिएको छ । बैठक हलमा साउण्ड सिस्टम जडान गर्दा १६ लाख ७७ हजार रुपैयाँ खर्च भएको छ । आन्तरिक सजावटका लागि मात्रै १७ लाख ७६ हजार खर्च भएको छ । बैठक हलमा २० वटा एसी, ६० वटा पङ्खा पनि जडान गरिएको छ ।
