काठमाडौं । प्रधानमन्त्री शेरबहादुर देउवाले भारतीय सहयोगमा बनेको ललितपुरको बागडोलस्थित ज्यापु समाज ज्येष्ठ नागरिक आनन्द निकेतनको नवनिर्मित भवन उद्घाटन गरेका छन् ।
नेपालका लागि भारतीय राजदूत महामहिम विनय मोहन क्वात्राको उपस्थितिमा शनिबार प्रधानमन्त्री देउवाले भवन उद्घाटन गरेका हुन् ।भारत सरकारको ५ करोड रुपैयाँको लागतमा भवन बनाइदिएको हो ।
ज्येष्ठ नागरिकहरूका लागि नवनिर्मित भवन एक नमुना वृद्धाश्रमको रूपमा रहेको जनाइएको छ । त्यहाँ बृद्धबृद्धाहरूको हेरचाहका लागि आधुनिक, अपाङ्गमैत्री संरचनासहितको सुविधा उपलब्ध छ । भवनमा ११० वटा बेडका साथै स्वास्थ्य परीक्षण कक्ष, भान्छा कोठा, अत्यावश्यक फर्निचर र उपकरणहरू जडान गरिएको छ ।
भारतीय राजदूत क्वात्राले यस्ता परियोजनाहरूको कार्यान्वयनले समुदाय स्तरमा विकास गर्न मद्दत पुग्ने जनाउँदै ज्यापु समाजलाई धन्यवाद दिए । उनले नेपाली समाजमा ज्यापु समाजले पुर्याएको योगदानको कदर पनि गरेका थिए ।
दूतावासले नेपालभर हालसम्म ४५० भन्दा बढी उच्च प्रभाव सामुदायिक विकास परियोजना सम्पन्न गरिसकेको काठमाडौंस्थित भारतीय दूतावासले जनाएको छ ।