काठमाडौंको मित्रपार्कमा दुई युवा लुटिएका छन् । विदेशबाट सुन लिएर आएका दुई जना लुटिएका हुन् ।
सोमबार राति ९ बजेतिर तीन जनाको समूहले झापाका मातृका चौलागाईं र नवलपरासी घर भएका विजय पुलामी मगरलाई लुटपाट गरेको प्रहरीले जनाएको छ ।
एयरपोर्टबाट मातृका र विजय चढेको ट्याक्सीलाई पछ्याएर तीन जनाको समूहले सुन लुटेर भागेको पीडितले बताएका छन् ।लुटेराहरुले विदेशबाट ल्याएको एक सय ग्राम तौल बराबरको दुई ओटा बाला लुटेर भागेको प्रहरीले जनाएको छ ।
मित्रपार्कमा ट्याक्सीबाट ओर्लने क्रममा उनीहरू लुटिएका हुन् ।
पीडितका अनुसार, लुटेराहरु केटिएम ड्यूक मोटरसाइकलमा आएका थिए ।
चौलागाईं र पुलामी चढेको बा १ ज ३५९० नम्बरको ट्याक्सीलाई महानगरीय प्रहरी वृत्त गौशालाको टोलीले नियन्त्रणमा लिएको छ ।
मातृका र विजय कतारको दोहाबाट हिमालय एयरलाइन्स मार्फत काठमाडौं आएका थिए ।
लुटपाटमा संलग्न व्यक्तिहरूबारे अनुसन्धान भइरहेको महानगरीय प्रहरी परिसर काठमाडौंका प्रवक्ता (एसपी) रमेश बस्नेतले बताए ।
