५४ दिनपछि निजी सवारी साधन सडकमा गुड्दा काठमाडौं उपत्यकाभित्रको सडकमा भिडभाड देखिएको छ । बिहान कार्यालय समयमा विभिन्न चोकहरूमा ट्राफिक जामसमेत छ । चक्रपथ, कलंकी, कोटेश्वर, बानेश्वर, सातदोबाटो, कालीमाटी, जमल लगायतका क्षेत्रमा बिहान १० बजे केही बेर जाम भएको ट्राफिक प्रहरीले जनाएको छ ।
काठमाडौं उपत्यकाभित्रका तीनवटै जिल्लाका प्रमुख जिल्ला अधिकारीले मङ्गलबारबाट निजी सवारी साधनलाई जोरबिजोर प्रणालीमा चल्न दिने निर्णय गरेका थिए । त्यसैले आज बिहानैदेखि सडकमा निजी सवारी साधनको चाप देखिएको हो ।
अहिले निजी सवारी साधन जोर गते जोर नम्बर र बिजोर गते बिजोर नम्बर (नम्बर प्लेटको अन्तिम अक्षर)का सवारी चल्नेछन् । तर, सार्वजनिक सवारी साधन भने अझै सञ्चालनमा आएको छैन । ट्याक्सीलाई पनि जोरबिजोर प्रणालीमा चल्न दिइएको छ ।
लकडाउन खुकुलो भएसँगै विभिन्न ठाउँमा हुँदै आएको चेकजाँच समेत बन्द गरिएको छ । अहिले मुख्य चोकहरूमा मात्र सवारी साधन चेकिङ गर्न थालिएको छ । अहिले सञ्चालनमा आएका गाडीहरूलाई पनि प्रहरीले विभिन्न स्थानमा चेकिङ गर्दै आएको छ । चेकिङ पोस्ट नजिक रोकिनुपर्दा केही बेर सवारी साधनहरूको जाम हुँदै आएको छ ।