कोरोना भाइरसको महामारीको विषम परिस्थितिमा आम नागरिक सङ्कटमा छन्। कोरोना नियन्त्रण तथा रोकथामको लागि गरिएको लामो निषेधाज्ञाका कारण मानवीय उत्पन्न भएको हो ।
यस्तो विषम परिस्थीमा धेरैको रोजीरोटी गुमेको छ । जस कारण कतिपयलाई चुलो बाल्न समेत समस्या छ । विषेशगरी ज्याला मजदुरी गरेर जीविका चलाउनेहरू अप्ठेरोमा छन् । अरूको सहारामा बाँच्नुपर्ने दृष्टिविहीन, अपाङ्गता भएकाहरू भने झनै समस्यामा छन् । तीनै अफ्टोमा परेका खाद्यान्न समस्या भएका परिवारलाई राहत वितरण सुरु गरिएको छ ।
लकडाउन लम्बिँदै जाँदा उनीहरूको जीविका चलाउनै समस्यामा परेपछि चर्चित गायक यम बरालको पहलमा मङ्गलवार काठमाडौंको भत्केको पुल, कालोपुल, चाबहिल र बौद्धको ह्यात गेट अगाडी राहत वितरण गरिएको हो । राहत वितरण गर्ने काम बुधबार पनि जारी रहने छ। राहतमा १५ किलो चामल, दुई किलो दाल, १ किलो नुन र एक लिटर खाने तेल वितरण गरिएको छ ।
अमेरिकाको पिट्सबर्ग पेन्सिलभेनियामा रहेका समाजसेवी भुवन आचार्य, ह्यारिसबर्ग पेन्सिलभेनियामा बस्ने व्यवसायी तथा कलाकार राजेश अर्याल र व्यापसाइ तथा कलाकर्मी नवीन बुढाथोकीको सहयोगमा राहत वितरण गरिएको हो ।
राहतको पहिलो प्राथमिकतामा असक्तहरू छन् । तर पनि नियमित आम्दानी नभएको र लकडाउनका कारण समस्या परेकाहरूलाई राहत वितरण गर्दै आएको गायक बरालले बताए । बरालले भने ‘हाम्रो पहिलो प्राथमिकतामा दृष्टिविहीन तथा असक्तहरू छन् । काठमाडौंमा बस्ने कोही यस्ता व्यक्तिहरू भोकै छन् भने उहाँहरूको लागि हामी राहतको लागि पहल गछौं । कोही पनि भोकै राख्दैनौँ ।’
‘सरकार सम्पूर्ण मजदुरलाई राहत प्याकेज ल्याऊ, भोकसँग लड्न नागरिकलाई साथ देऊ ’ भन्ने नाराको साथमा यसलाई कार्यान्वयन गर्न सरकारलाई दबाब दिने अभियान स्वरूप दृष्टिविहीन, अपाङ्गता भएका र मजदुरलाई राहत वितरण गरिएको गायक बरालले बताए ।