काठमाडौंको नयाँ बसपार्कमा ट्राफिक प्रहरीले बढी जरिवाना गराएको भन्दै विरोध स्वरूप बस ब्यावसायीले सडक अवरुद्ध गरेका छन् । ट्राफिक नियममै नभएको ५ हजार रुपैयाँ जरिवाना गराइएको भन्दै उनीहरूले भत्काइएको आकाशे पुल मुनी सडकमा बस तेर्स्याएर सडक अवरुद्ध गरेका हुन् ।
सडकमै बस तेर्स्याएपछि चक्रपथको सवारी आवागमन एक घण्टाभन्दा बढी रोकिएको थियो । अहिले भने सडक खुलेको छ । विरोधमा उत्रिनेहरूमा काठमाडौँबाहिर जाने यात्रु बाहक बस हुन् ।
पश्चिम नेपाल बस व्यवसायी सङ्घलगायतमा आबद्धका चालकहरू आन्दोलनमा थिए । उनीहरूले ५ हजार जरिवाना गराएपछि बाध्य भएर विरोधमा उत्रिएको दाबी गरेका छन् ।
महानगरीय ट्राफिक प्रहरी महाशाखाले भने यात्रुबाट तोकिएभन्दा बढी भाडा असुल गरेपछि कारबाही गरिएको बताएको छ ।
महाशाखाका प्रवक्ता श्याम कृष्ण अधिकारीले नेपाल फ्ल्याससँग भने ‘तोकिएभन्दा बढी भाडा लिएको पाइएपछि नियमअनुसार कारबाही गरेका हौँ, उहाँहरूले गराएको सडक अवरोध अहिले खुलाइसकेका छौँ ।'