काठमाडौं । ४० वर्षसम्म भारतका विभिन्न जेलमा बन्दी जीवन व्यतीत गरेका दुर्गाप्रसाद तिम्सिना (दीपक जैसी)को आमासँग भेट भएको छ ।
माई नगरपालिका-१०लुम्बाकस्थित घर पुगेसँगै ८५ वर्षीय आमा र दुर्गाको भेट भएको हो । लामो समय अलग भएका छोरासँगको भेटले आमा पनि खुसी भएकी छिन् ।
दुर्गाप्रसाद आइतबार आइपुग्ने खबरसँगै उनकी आमा, आफन्त र गाउले भेला भएका थिए ।
अदालतको आदेशपछि शनिबार दुर्गाप्रसाद तिम्सिना (दिपक जैसी) कोलकातास्थित दमदम जेलबाट मुक्त भएका हुन् । दुर्गा प्रसादलाई लिन उनका भाइ प्रकाशचन्द्र, कोलकातास्थित नेपाली वाणिज्य दूतावासका सचिव सतिश थापालगायतको टोली कोलकाता पुगेका थिए ।
उनका भाइका अनुसार उनको मुद्दाको अन्तिम फैसला भने भइसकेको छैन । १९ वर्षको उमेरमा तोरी बेच्न पश्चिम इलामको मङ्गलबारे बजार जाने निहुँले दुर्गाप्रसाद रोजगारीका लागि दार्जिलिङ पुगेका थिए । दार्जिलिङमा उसबेला गोर्खाल्याण्ड प्राप्तिका लागि हिंसात्मक आन्दोलन चलिरहेको अवस्था थियो ।
