आइतबार साँझ घरबाट निस्किएर बेपत्ता भएका एकै घरका पाँच जनामध्ये थप दुई जनाको शव फेला परेको छ ।
बेपत्ता रहेका आमा सुकु बडुवाल, छोरी ७ वर्षीया रजनी बडुवाल र छोरा १० वर्षीय ललित बडुवालको खोजीका लागि आज बिहानैदेखि नेपाल प्रहरी, सशस्त्र प्रहरी र स्थानीय बासिन्दा खटिएका थिए । नेपाल प्रहरी, सशस्त्र प्रहरी र स्थानीय बासिन्दाको संयुक्त प्रयासमा आज (मंगलबार) दिउँसो १२ बजेतिर दुई जनाको शव फेला परेको जिल्ला प्रहरी कार्यालय दैलेखले जनाएकाे छ ।
सुकी बडुवाल र उनका छोरा १० वर्षीया ललित बडुवालको शव फेला परेको हाे । अझै ७ वर्षीया रजनी बडुवाल बेपत्ता छिन् । उनको खोजी भइरहेको प्रहरीले जनाएको छ । आमा सहित बेपत्ता भएका मध्ये १५ वर्षीया कल्पना वडुवाल र १२ वर्षीया सरिता बडुवालको शव सोमबार दिउँसो फेला परेको थियो।
जिल्लाको आठबीस नगरपालिका–३ निमाइलका ३५ वर्षीया सुकी बडुवाल उनका छोरीहरू १५ वर्षीया कल्पना वडुवाल, १२ वर्षीया सरिता बडुवाल, ७ वर्षीया रजनी बडुवाल र छोरा १० वर्षीय ललित बडुवाल सोमबार साँझ घरबाट निस्किएपछि बेपत्ता थिए ।
