काठमाडौं । सौर्य राष्ट्रिय दैनिक पत्रिकाले कर्मचारी तथा पत्रकारलाई सम्मान प्रदान गर्दै आफ्नो १०औँ वार्षिकोत्वसव समारोह शुक्रबार सम्पन्न गरेको छ । साप्ताहिकबाट सेवा सुरु गरेको पत्रिका दैनिक भएको शुक्रबार १० वर्ष पुगेको हो ।
काठमाडौंमा भएको उक्त समारोहमा सो दैनिकले पत्रकारितामार्फत समाजमा गरेको योगदानको चर्चा गरिएको थियो । लामो समयदेखि राम्रो काम गरेर पत्रिकालाई थप उचाइमा पुर्याएको भन्दै पत्रकारदेखि केही कर्मचारीलाई सम्मान पनि गरिएको थियो ।
लामो समयदेखि संस्थामा रहेर उत्कृष्ट काम गरेकको भन्दै पत्रकार बाबुराम सिग्देल सम्मानित भएका छन् भने छोटो समयमै राम्रो काम गरेको भन्दै एकाउन्टेन प्रतिज्ञा न्यौपानेलाई सम्मान गरिएको छ । त्यस्तै, डिजाइनरबाट पुण्यवती वलामी र मार्केटिङबाट देवकृष्ण श्रेष्ठ सम्मानित भएका छन् भने सुजित नेपाललाई पनि सम्मान गरिएको छ ।
‘सौर्य दैनिकको स्थापनाका लागि योगदान गर्नुहुने सबै सहयोगी तथा शुभेच्छुकहरूप्रति यस घडीमा आभार व्यक्त नगरी रहन सकिन्न, प्रधानसम्पादक बोधराज त्रिपाठीले भने, ‘यस दैनिकलाई दीर्घजीवी बनाउने अभियानमा संलग्न सञ्चारकर्मी तथा कर्मचारीहरूलाई पनि धन्यवाद दिनैपर्छ र सौर्य दैनिकलाई नेपाली सञ्चार उद्योगको अंगका रूपमा स्थापित गर्ने हाम्रो होस्टेमा हैंसे गरिदिन समस्त पाठक, विज्ञापनदाता तथा शुभचिन्तकलाई हार्दिक अनुरोध पनि गर्दछु’ यस अवसरमा हामी सम्पूर्ण पाठक, विज्ञापनदाता तथा शुभेच्छुकहरूसँग खुसी साट्दै सदाझैं अविछिन्न सहयोग र सद्भावको अपेक्षा गर्दछु ।’
सम्मान कार्यक्रममा प्रधानसम्पादक त्रिपाठीले पत्रिकामा स्थापनाकालदेखि योगदान गर्ने सहयोगी तथा शुभेच्छुकप्रति आभार व्यक्त गर्दै सहभागी सबै सञ्चारकर्मी तथा कर्मचारीलाई धन्यवाद दिए ।
