काठमाडौं । सपना रोका मगरले विनयजंग बस्नेतविरुद्ध जाहेरी दिएकी छिन् ।
सपना केही समयअघि बिबिसीको १०० प्रभावशाली महिलाको सूचीमा पर्न सफल भएकी थिइन् ।
सपनाले 'आफ्नो मानमर्दन् तथा बेइज्जत गरेको' भन्दै बस्नेतविरुद्ध जाहेरी दिएको काठमाडौं महानगरीय प्रहरी परिसरका प्रहरी प्रवक्ता एसपी रमेश बस्नेतले जानकारी दिए ।
पछिल्लो समय विनयले 'सपनाको अश्लील सामग्री (फोटो/भिडियो) सार्वजनिक गर्ने' सार्वजनिकरुपमा अभिव्यक्ति दिँदै आएका थिए ।
सपना र विनयले काठमाडौंका बेवारिसे शवहरुको व्यवस्थापन गर्दै आएका थिए ।
उनीहरुले त्यस समय एकअर्कालाई बाबु छोरीको रुपमा रहेको बताउने गरेका थिए ।
विनय र सपनाबीच पछिल्लो समय खटपट भएको सार्वजनिक भएको थियो ।
बिबिसीले सपनालाई संसारकै १०० प्रभावशाली महिलाको सूचीमा चयन गरेको केही समयपछि उनीहरुबीचको विवाद बाहिरिएको थियो ।
हाल उनीहरुले छुट्टाछुट्टै समूहमा काम गर्न थालेका छन् ।
उजुरी परेसँगै प्रहरीले विनयलाई पक्राउ गर्ने तयारी गरेको छ ।