सुर्खेत । जुम्लाको तिला गाउँपालिकाको गोठी गाउँमा भीषण आगलागी भएको छ ।
मंगलबार भएको आगलागीबाट २८ घर जलेर नष्ट भएको प्रहरीले जनाएको छ ।
जिल्ला प्रहरी कार्यालय जुम्लाका प्रहरी निरीक्षक देवराज भट्टराईका अनुसार आगलागी भएको ठाउँतर्फ प्रहरीको टोली गइसकेको छ ।
आगलागीबारे साँझ ६ बजेमात्र जानकारी आएको भट्टराईले बताए ।
उनका अनुसार अहिलेसम्म २८ घर जलेको खबर आएको छ ।
आगो नियन्त्रणमा नरहेका कारण घरहरु अझै जलेको हुन सक्ने आँकलन गरिएको छ ।
आगलागी भएको गाउँसम्म पुग्न जिल्ला सदरमुकामबाट करिब चार घण्टा लाग्छ ।
आगलागीको कारण र क्षतिको बारेमा विस्तृत विवरण आउन बाँकी छ ।