बुटवल । रुपन्देहीको मर्चवार क्षेत्रमा एक युवाको जलाएर हत्या गरी फालेको अवस्थामा शव भेटिएको छ ।
मायादेवी गाउँपालिका–७ दानव नदी नजिकको खेतमा अन्दाजी ३० वर्षीय युवाको जलाएर हत्या गरी फालिएको अवस्थामा शव फेला परेको हो ।
रहस्मय घटना भएको भन्दै जिल्ला प्रहरी कार्यालय रुपन्देहीले मंगलबार राति नेपालगञ्जबाट कुकुर ल्याएर अनुसन्धान गरेको प्रहरी प्रमुख एसपी प्रविण पोखरेलले जानकारी दिए ।
तीन किलोमिटरसम्म कुकुरले ‘फलो’ गरे पनि त्यसपछि स्थान पहिचान गर्न नसकेको उनले बताए ।
युवालाई घाँटी थिचेर हत्या गरी नदी किनारमा ल्याएर पेट्रोल छर्केर आगो लगाएको हुन सक्ने प्रहरीको अनुमान छ ।
भारतीय सीमाबाट ५ किलोमिटरको दूरीमा युवाको शव भेटिएकाले हत्या भएका युवा भारतीय हुन सक्ने प्रहरी प्रमुख पोखरेलले बताए ।
शरीर नांगो छ भने अनुहार आगोले जलेको छ । घटनास्थलमा पाइप, पेट्रोलको बोत्तल भेटिएको छ ।
घटनाको बारेमा प्रहरीले मंगलबार दिउँसो २ बजेतिर खबर पाएको थियो ।
शवको पहिचान नभएकाले घटना रहस्मय बनेको छ। शवलाई पोष्टमार्टमका लागि बुटवलस्थित लुम्बिनी प्रादेशिक अस्पतालमा राखिएको छ ।
