सुर्खेत । मध्यपश्चिमाञ्चल विश्वविद्यालयमा विद्यार्थी र प्रहरीबीच झडप भएको छ ।
स्थितिलाई नियन्त्रणमा लिन प्रहरीले केही राउण्ड अश्रुग्यास समेत प्रहार गरेको छ ।
विश्वविद्यालयका भिसी नन्दबहादुर सिंह कार्यालयबाट निस्किने क्रममा विद्यार्थीहरुले ढुंगामुढा गर्न थालेपछि तनावग्रस्त बनेको हो ।
घटनामा केही विद्यार्थी घाइते भएका छन् । सुर्खेत प्रहरीका डिएसपी रामप्रसाद घर्तीका अनुसार घटनामा तीन जना विद्यार्थी घाइते भएका छन् ।
विश्वविद्यालयका भिसी सिंहलाई ज्ञापन पत्र बुझाउन विद्यार्थीको एउटा समूह कार्यालय पुगेको थियो ।
तर, सिंहले ज्ञापन पत्र बुझ्न मानेनन् । उनले मातहतका परीक्षा नियन्त्रण कार्यालय लगायतलाई ज्ञापन पत्र बुझाए हुने बताएका थिए ।
सिंहले ज्ञापन पत्र बुझ्न नमानेपछि आक्रोशित विद्यार्थीहरुले उनी निस्किने क्रममा ढुंगामुढा गरेको सुर्खेत प्रहरीका डिएसपी घर्तीले बताए ।