भक्तपुरमा गएराति भएको ट्रक दुर्घटनामा चालकको मृत्यु भएको छ ।
गएराति करिब २ बजे तिर भैँसी बोकेको ट्रक दुर्घटना हुँदा चालकको घटनास्थलमै मृत्यु भएको हो ।
भक्तपुरको सूर्यबिनायक नगरपालिका ८ आदर्श महेश्वरी पेट्रोलपम्प नजिक ना ६ ख ३९८२ नम्बरको ट्रक दुर्घटना भएको हो ।
सो दुर्घटनामा चालक ३० वर्षीय कैमोदिन अन्सारीको मृत्यु भएको प्रहरी उपरीक्षक दिपक गिरीले जानकारी दिए ।
वीरगञ्ज महानगरपालिका १२ घर भएका अन्सारीको शव दुर्घटनामा परेको ट्रकमा च्यापिएको अवस्थामा फेला परेको प्रहरीले जनाएको छ ।
मृतक कैमोदिनको शव पोष्टमार्टमको लागि केएमसी अस्पताल दुवाकोट पठाइएको प्रहरीले जनाएको छ ।
ट्रकमा रहेका ११ वटा भैँसी पनि घाइते भएका छन् ।