बेनी । म्याग्दीमा भएको बोलेरो जिप दुर्घटनामा एक जनाको मृत्यु भएको छ ।
मङ्गला गाउँपालिका–२ बावियाचौरको काफलचौरमा भएको दुर्घटनामा पाँच जना घाइते भएका छन् ।
बाबियाचौर लाम्पाटाबाट सल्लान जाँदै गरेको प्रदेश २–०३००१ च ०२५२ नम्बरको बोलेरो जिप आज बिहान भाइबाङ खोला नजिकको सडकबाट खसेर दुर्घटना भएको हो ।
दुर्घटनमा जिपमा सवार ११ वर्षीया बालिका करिश्मा क्षेत्रीको मृत्यु भएको जिल्ला प्रहरी कार्यालयले जनाएको छ ।
दुर्घटनमा चालक ४२ वर्षका खुमबहादुर कटुवालसहित पाँच जना घाइते भएका छन् ।
घाइते चालक कटुवाल र उनकी श्रीमती सुनिता क्षेत्री, जीपमा सवार सुकला केसी, कृपा क्षेत्री र राजन क्षेत्रीलाई उपचारका लागि बेनी अस्पताल लगिएको छ ।
