काठमाडौं । प्रधानमन्त्री केपी शर्मा ओलीले सरकारले देशका कुनै पनि नागरिकलाई एक्लो महशुस हुन नदिने बताएका छन् ।
सामाजिक सुरक्षा दिवसका अवसरमा आज (बिहीबार) बिहान भिडियो सन्देश जारी गर्दै प्रधानमन्त्री ओलीले सरकारले कसैलाई पनि एक्लो महशुस हुन नदिने दाबी गरेका हुन् ।
सरकारले मंसिर ११ लाई सामाजिक सुरक्षा दिवसका रूपमा मनाउँदै आएको छ ।
‘अनाथ वा सहाराविहीन हुनु दुःखको कुरा हो,’ सन्देशमा ओलीले भनेका छन् ।
‘कसैले अनाथ भएँ भन्नु पर्दैन । अनाथ हुनु दुःखको कुरा हो,’ प्रधानमन्त्री ओलीको सन्देशमा भनिएको छ, ‘अनाथ भएँ भनेर, रेखदेख गर्ने कोही छैन भन्नुपर्ने अवस्था छैन । सहारा छैन भन्नुपर्दैन । सरकार छ । राज्य छ ।’
प्रधानमन्त्री ओलीले योगदानमा आधारीत सामाजिक सुरक्षा अवधारणा सुरू गरिसकिएको चर्चा गर्दै समाजका कोही पनि सदस्य सुरक्षा नपाएर त्रसित भएर जीवनयापन गर्न नपरोस् भनेरै यस्ता कार्यक्रम लागू गरिएको बताए ।
हेर्नुहोस् भिडियो सन्देशः