शुक्रवार तिहारको पहिलो दिन, काग तिहार । विधिवत् रुपमा तिहार सुरु भएको छ । तिहार सुरु भएसँगै तिहारका लागि किनमेल गर्न बजारमा मानिसहरूको भिडभाड बढेको छ । काठमाडौंका असन, इन्द्रचोक र महाबौद्ध लगायतका बजारमा तिहारका लागि सप्तरङ्गी टीका, भाइमसला, फूल र झिलिमिली बत्तीलगायत विभिन्न वस्तुहरू खरिद गर्न आउनेको भीड बढेको छ ।
कोरोना सङ्क्रमणका बाबजुद पनि मानिसहरू तिहारका सामान किन्न बजार धाइरहेका छन् । खास गरी राजधानीको असन, इन्द्रचोक, न्यूरोड, बानेश्वर, कालीमाटी लगायतका स्थानहरू उपभोक्ताको भीडभाडका कारण मेलास्थल जस्तै देखिन्छन् ।
कोरोना सक्रमणको बाबजुत बजारमा किनमेल गर्ने भीडले तिहारको रौनकलाई दर्साएको छ । राजधानीको पुरानो बजार असनमा तिहारको लागि भाइमसला तथा फूलका माला किन्नेहरूको भीड लागेको छ ।
यहाँ भाइमसलासहित सबै किसिमका उपभोग्य वस्तुको थोक तथा खुद्रा व्यापार हुने गर्छ । तिहारमा भाइमसला किन्नेहरू भने विशेष भीड छ । यस्तै झिलिमिली बत्ती किन्ने पसलमा पनि उपभोक्ताहरू अत्यधिक सङ्ख्यामा देखिन्छन् ।
भोटाहिटीका कपडा पसहलरूमा पनि सामान्य अवस्थाको भन्दा बढी भीड देखिन्छ । किराना पसलहरूमा पनि उपभोक्ता त्यतिकै पुगेका छन् । तिहारमा लागि आवश्यक खाद्यान्न र सरसामान किन्नेको घुइँचो पनि बजारमा थामिनसक्नु देखिन्छ ।
बजारमा मूल्यवृद्धि अस्वाभाविक रुपमा बढेको छ । सर्वसाधारणहरू भन्छन् ‘ भाउ बढे पनि अत्यावश्यक वस्तु नकिनी सुखै छैन ।’
