कैलाली । कैलालीको अस्थायी प्रहरी बिट, जुगेडामा कार्यरत प्रहरी जवान रामबहादुर साउदको पनि शव भेटिएको छ । सँगै ड्युटीमा रहेका असईको शव भेटिएको चार दिनपछि मंगलबार उनको शव भेटिएको हो । इन्चार्ज गोविन्द (असई) विकको शव भेटिएको ठाउँबाट करिब २०० मिटर टाढा नदीभित्र गाडिएको अवस्थामा उनको शव भेटिएको बताइएको छ ।
शनिबार राति मोटरसाइकल गस्तीमा गएका बेला असई विक र जवान रामबबहादुर साउदलाई तस्कर समूहले निशानामा पारी हत्या गरिएको आशंका गरिएको छ । यद्यपि पुष्टि भने भइसकेको छैन ।
तर, प्रहरीले मंगलबार अनुसन्धान हत्यारा पत्ता लगाउने नजिक पुगेको जानकारी दिएको छ । उनीहरुको हत्या भएको भोलिपल्ट नै इन्चार्ज विकको शव मोहना नदीमा भेटिएको थियो ।तर, हवलदार भने सम्पर्कविहीन थिए ।
घटनामा संलग्न भएको आशङ्कामा प्रहरीले केहीलाई नियन्त्रणमा लिइ अनुसन्धान गरिरहेको छ । उनीहरु सामूहिक आक्रमणमा परेको प्रहरीको प्रारम्भिक निष्कर्ष छ ।