वर्षेनी दसैँमा भेडा च्याङ्ग्रा र खसी बोका बेच्दै आएको सरकारी संस्थान खाद्य व्यवस्था तथा व्यापार कम्पनीले यो वर्ष भने च्याङ्ग्रा नबेच्ने भएको छ। चीनबाट भेडा च्याङ्ग्रा नभित्रिएको र स्वदेशी महँगो भएको भन्दै खसीबोका मात्रै बेच्ने भएको हो ।
सहुलियत दरमा बिक्री गर्नका लागि खरिद गरेका एक हजार खसीबोकामध्ये २०५ वटा काठमाडौं आइपुगेका छन् । कम्पनीका नायब महाप्रबन्धक श्रीमणि खनालका अनुसार कम्पनीले सोमबारदेखि खसीबोका बिक्री थाल्ने भएको छ ।
‘खसीबोका भित्रिने क्रम छ। पहिलो लट आइसकेको छ। आजै थप अर्को लट पनि आइरहेको छ,’ उनले भने।
कम्पनीले मंगलबारसम्ममा एक हजार खसीबोका ल्याउने उनले बताए । राजधानीमा बिक्रीका लागि कम्पनीले हेटौँडा र दाङको तुल्सीपुरबाट खसीबोका खरिद गरेको हो । एकैचोटि धेरै ल्याएर व्यवस्थापन गर्न गाह्रो हुने भएकाले थोरै थोरै ल्याउँदै बिक्री गरिने कम्पनीले जनाएको छ ।
कम्पनीले खसीबोकाको बिक्री सोमबारदेखि थापाथलीस्थित बिक्रीकक्षबाट गर्ने टुंगो गरेको छ।
मूल्य भने तोक्न बाँकी छ। केही खसीबोका आइपुगेका हुनाले मूल्य निर्धारण आइतबार बेलुकासम्म हुने कम्पनीले जनाएको छ । उपभोक्तले कम्पनीबाट खसीबोका खरिद गर्दा १० रुपैयाँ छुट पाउनेछन् । कम्पनीले यो दसैँका लागि च्याङ्ग्रा खरिद गरेको छैन ।
गत महिना कम्पनीले दसैंका लागि १४ सय च्याङग्रा ल्याउने निर्णय गरेको थियो। पछि एक हजार वटा च्याङग्राको ढुवानी टेन्डर गरे पनि दरभाउ नमिलेर किन्न नसकेपछि च्याङ्ग्रा नल्याउने निर्णय गरेको हो ।
