काठमाडौं ।प्रमुख प्रतिपक्षी नेपाली कांग्रेसले हुम्लाको लिमीमा चीनले नेपालको दुई किलोमिटर क्षेत्र अतिक्रमण गरेको निष्कर्ष निकालेको छ । पूर्वमन्त्री तथा हुम्लाबाट निर्वाचित प्रदेश सांसद जीवनबहादुर शाही नेतृत्वको टोलीले ११ दिने स्थलगत अवलोकनपछि कांग्रेसले सो निचोड निकालेको हो ।
सो क्षेत्र भ्रमण गरेका शाहीले कतिपय स्थानमा चीनले दशगजामा विभिन्न संरचना र नौवटा भवन निर्माण गरेको बताए । ‘यसअघि नेपालले यी ठाउँभन्दा उत्तरतर्फ सडक खनेको छ,’ उनको भनाइ छ ।
यसअघि बुधबार कांग्रेस प्रवक्ता विश्वप्रकाश शर्माले एक विज्ञप्ति जारी गर्दै हुम्लाको सीमामा चीनले गरेको अतिक्रमण सार्वभौम राष्ट्र नेपालका लागि गम्भीर आपत्ति भएको बताएका थिए । शर्माद्वारा बुधबार जारी विज्ञप्तिमा भनिएको छ, ‘ नेपाल सरकारले गर्न खोजेको ढाकछोप र मौनता साथको राष्ट्रघात छ ।’
तर, यसअघि ७ असोजमा परराष्ट्रमन्त्री तथा सरकारका प्रवक्ता प्रदीपकुमार ज्ञवालीले चीनले नेपालको सीमा मिच यस्तो खबर आए पनि स्थलगत अवलोकन गर्दा अतिक्रमण नभएको पाइएको बताएका थिए ।
पछिल्लो पटक सीमा अतिक्रमणको विषयमा मुख खोलेको भन्दै हुम्लाका सहायक प्रमुख जिल्ला अधिकारी दत्तराज हमालबाट गृह मन्त्रालयले लिखित स्पष्टीकरण लिइसकेको छ ।
हुम्लाका प्रमुख जिल्ला अधिकारी चिरञ्जीवि गिरी नेतृत्वको टोलीले स्थलगत अवलोकनपछि तयार पारेको प्रतिवेदन सरकारले गोप्य राखेको छ ।
विज्ञ समूहले स्थलगत अवलोकन नगरी भूमि अतिक्रमण भए नभएको ठोकुवा गर्न नसकिएला । तर अन्तर्राष्ट्रिय सीमाजस्तो विषयलाई नेपाल सरकार र प्रमुख प्रतिपक्षी दलले कति हल्का रुपमा लिँदा रहेछन् भन्ने चाहिँ हुम्ला प्रकरणले देखाएको मान्न सकिन्छ । मुलुकको सिमाको विषयमा समेत दलहरूबीच मतैक्यता देखिएको छैन ।
