काठमाडौं । राजधानीको नयाँ बजारस्थित एक घरमा ग्यास सिलिन्डर पड्किएर आगलागी भएको छ ।
काठमाडौं महानगरपालिका वडा नम्बर १६ नयाँ बजारस्थित फलफूल चोकमा रहेको नीलकुमारी क्षेत्रीको घरमा ग्यास पड्किएर आगलागी भएको महानगरीय प्रहरी परिसर काठमाडौंका एसपी तथा प्रवक्ता सोमेन्द्र सिंह राठौरले जानकारी दिए ।
प्रहरीका अनुसार घटनामा ११ जना घाइते भएका छन् । घाइतेमध्ये दुई जनाको अवस्था गम्भीर रहेको छ ।
घाइतेहरुको पिपुल्स र मनमोहन अस्पतालमा उपचार भइरहेको छ ।
घरमा रहेको चार वटा ग्यास सिलिन्डर विस्फोट भएको प्रहरीले जनाएको छ । विस्फोटबाट घर क्षतिग्रस्त भएको छ । वरपरका घरहरुमा समेत क्षति पुगेको प्रहरीले जनाएको छ ।
प्रहरीका अनुसार, नीलकुमारीको ससुरा केही दिनअघि बितेपछि सो घरमा हाल किरीयाकर्म भइरहेको थियो ।
आज ग्यास सिलिन्डर खोल्दा एक्कासी लिक भएर आगलागी सुरु भएको बताइएको छ ।
ग्यास विस्फोटपछि भएको आगलागी दमकलको सहायताले निभाइएको स्थानीय सबिन श्रेष्ठले जानकारी दिए ।
थप फोटो हेर्नस्
