काठमाडौं ।संसदको विकास तथा प्रविधि समितिले नेपालमा प्रशारण गरिरहेका टेलिभिजन च्यानललाई विज्ञापनरहित (क्लिन फिड) बनाउन निर्देशन दिएको छ ।
आउँदो कात्तिक ७ गतेभित्र संसदको विकास तथा प्रविधि समितिले नेपालमा प्रशारण गरिरहेका टेलिभिजन च्यानललाई विज्ञापनरहित (क्लिन फिड) बनाउन सरकारलाई निर्देशन दिएको हो ।
सोमबार सञ्चार तथा सूचना प्रविधि मन्त्रालयका सचिवलगायत पदाधिकारीसँग छलफलपश्चात् समितिले डाउनलिंक अनुमति लिएर नेपालमा प्रशारण गरिरहेका टेलिभिजन च्यानलहरुलाई विज्ञापनरहित बनाउन निर्देशन दिएको छ ।
नेपालमा विज्ञापन (नियमन गर्ने) ऐन २०७६ को कार्यान्वयन २०७७ कात्तिक ८ गतेदेखि सुरु हुँदै छ ।
नेपालमा क्लिनफिड नहुने विदेशी च्यानलको प्रशारण रोक्न मन्त्रालयले बनाएको योजना पनि समितिले मागेको छ ।
यो ऐनको कार्यान्वयनबाट नेपालमा कतिवटा विदेशी च्यानल रोकिने अवस्थामा रहेका छन् र यसले पार्ने सकारात्मक/नकारात्मक प्रभावका बारेमा मन्त्रालयको धारणा १५ दिनभित्र पठाउन पनि समितिले निर्देशन दिएको छ ।
समितिले नेपालबाट विदेशी टेलिभिजन च्यानलमा विज्ञापन प्रशारण गर्ने नीति (फिड इन) नलिन पनि सञ्चार मन्त्रालयलाई निर्देशन दिएको छ ।
