परासी । नारायणी नदीमा डुंगा पल्टिदा एक जना बेपत्ता भएका छन् । बुधबार ईटा लोड गरे जाँदै गरेको डुंगामा सात जना सवार थिए । अन्य ६ जना भने पौडिएर बाँच्न सफल भएका छन् ।
पश्चिम नवलपरासीको सुस्ता गाउँपालिका–५ सुस्ता गाउँमा जनता आवास कार्यक्रम अन्तरगत घरहरु निर्माण भइरहेका छन् ।
सोही घर निर्माणका लागि पक्लिहवाबाट ल्याएको ईटा लोड गरेर लैजाने क्रममा बीच नदीमा डुंगा डुब्दा घटना भएको स्थानीय रविन्द्र जयसवालले बताए ।
डुंगामा करिब १४ सय ईटा लोड गरिएको थियो । पुल निर्माणका क्रममा नदीमा बनाइएको पिलर नजिक परेको पानीको भूँमरीमा गडेर डुंगा पल्टिएको रामनगर प्रहरी चौकीका सहायक निरीक्षक जनक थापाले बताए ।
बेपत्ता हुने घर निर्माणका लागि आएका भारतीय मजदुर हुन् । उनको खोजी कार्य भइरहेको थापाले बताए ।
नारायणी नदीमा पुल नहुँदा सुस्ताका स्थानीयहरु जोखिम मोलेर डुंगाबाट आवतजावत गर्दछन् ।
डुंगा चल्न नसक्ने अवस्थामा दैनिक किनमेल र अन्य कामका लागि स्थानीयहरुलाई आफ्नै देश आउन भारतीय बाटो हुँदै आउनु पर्ने बाध्यता छ ।