उपत्यकाका तीनवटै जिल्ला प्रशासन कार्यालयले पसल व्यवसाय सञ्चालन गर्ने सम्बन्धमा तोकेका सर्तहरू उल्लंघन गर्दै व्यवसायीहरुले बजार खुलाएका छन् । उपत्यकाका प्रमुख जिल्ला अधिकारीहरूले सातामा तीन दिन बजार खोल्न दिएको आदेश अव्यावहारिक भन्दै काठमाडौंको मुख्य व्यापारिक स्थल न्यरोडलगायतका स्थानमा व्यवसायीहरूले बजार खुलाएका हुन् ।
उपत्यकाका प्रमुख जिल्ला अधिकारीहरूले कुन बार कुन पसल खोल्ने र कुन बन्द गर्ने भन्ने सूची सार्वजनिक गरेका थिए । तर, लामो लकडाउन र निषेधाज्ञाबाट निसास्सिएका काठमाडौंबासीले जिल्ला प्रशासनको त्यो आदेशलाई रद्दीको टोकरीमा मिल्काइदिएका हुन् ।
न्युरोडलगायतका धेरै कम्प्लेक्स तथा सपिङ मलहरू आइतबारबाट खुलेका छन् । प्रशासनले कपडा पसल, जुत्ता पसल, कस्मेटिक, पसलहरू मात्र खुलाउनू भने पनि सबै प्रकारका पसलहरू खुलेका छन् । व्यापार–व्यवसाय ६ महिनाभन्दा बढी ठप्प हुँदा आफूहरूलाई मर्का परेको भन्दै व्यावसायीहरु एकजुट भएर बजार खुलाएका हुन् ।
यसअघि कोरोना सङ्क्रमणबिच सरकारले साउन ७ पछि लकडाउन खुकुलो पारेपछि बजार खुल्न थालेको थियो । लडाउनका कारण झन्डै तीन महिनासम्म ठप्प भएको बजारमा खुकुलोसँगै फाट्टफुट्ट सर्वसाधारण देखिन थालेका थिए ।
यत्तिकैमा फेरि भदौ ३ गतेबाट निषेधाज्ञा लगाइएपछि पुन बजार बन्द भएका थिए । आइतबार बजार खुलेपछि पछिल्लो समय तीन सातायता घरभित्र थुनिएका सर्वसाधारणको चहलपहल बढेको छ ।
प्रशासन भन्छ ‘आफैँ सचेत हुनुहोस्’
आफूहरूले गरेको निर्णय कार्यान्वयन नभएको जिल्ला प्रशासन कार्यालय काठमाडौंले स्वीकारेको छ । ‘अहिले काठमाडौंमा सबै प्रकारका पसलहरू प्रायः खुलेका छन् ।
केही सटरहरू बन्द पनि देखिन्छन्, सकेसम्म हामीले अनुगमनको क्रममा सम्झाइ–बुझाइ गरिरहेका छौँ, तर उहाँहरू आफैँ सचेत हुनुपर्ने हो,’ सहायक प्रमुख जिल्ला अधिकारी जीवनप्रसाद दुलालले भने ।
कोरोना महामारी र लामो समयको लकडाउन र निषेधाज्ञाबाट जनजीवनमा परेको असरका कारण जोर जबरजस्ती पसल आफूहरूले बन्द गराउन नसक्ने उनले बताए ।
आदेश कसैले कसैका लागि दिएको नभई आफ्नै लागि भएकाले पालना गर्नेतर्फ ध्यान दिनुपर्ने उनको भनाइ छ । यसअघि शुक्रबार काठमाडौँ महानगरपालिकाकी उपमेयर हरि प्रभा खड्गीले फुटपाथका पसलहरू बन्द गराउनुपर्ने भन्दै प्रमुख जिल्ला अधिकारीलाई ज्ञापन पत्र बुझाएकी थिइन् ।