गत बुधबार रातिको बाढी र पहिराले बागलुङको ढोरपाटन नगरपालिका–९ बोबाङमा हराइरहेका २४ मध्ये एकजना पुरुषको शव फेला परेको छ ।
प्रहरीले बेपत्ता मानिस खोज्ने क्रममा आज भुजीखोला किनारमा एक पुरुषको शव फेला पारेको हो ।
बीभत्स शवको उमेर अन्दाज गर्नसमेत कठिन रहेको प्रहरी निरीक्षक प्रकाशसिंह भण्डारीले बताए । २३ जना अझै हराइरहेका छन् ।
हराएकामा १५ दिने शिशुदेखि वयोवृद्धसमेत छन् । मृत्यु भएका १४ मध्ये १३ जनाको शव सनाखत भएको छ । एक जनाको शव सनाखत हुन बाँकी छ ।
भुजीखोलामा फेला परेको शव बुर्तिबाङ प्राथमिक स्वास्थ्य केन्द्रमा ल्याउने तयारी भइरहेको छ ।
प्रहरीले हराएकाको खोजी जारी राखेको छ । आज पनि बिहानदेखि खोजी भइरहेको छ ।
